US Open mixed doubles title humhimtute Sara Errani leh Andrea Vavassori

US Open mixed doubles title humhimtute
Sara Errani leh Andrea Vavassori
Ni hnih awh US Open mixed doubles inelna chu Nilaini khan zawh fel niin, champion lai Sara Errani leh Andrea Vavassori tangdun bawkin final-a an khingpui third seeds Iga Swiatek leh Casper Ruud thawkdun chu 6-3, 5-7, 10-6-a hnehin an title kawl lai an humhim.
Flushing Meadows, New York-a US Open mixed doubles khelh dan kalphung thar an hman tak hi US Open singles khelh tan hmaa zawh fel diam theih tura duan a nih vangte pawh a ni ang a, kum dang ang lo takin singles lama top player-te an inlan thup.
Singles ranking chu chhuak thei tur tehna a nih miau avangin defending champion Italian pair pawh hi wild card entry hmangin an inlan thei tawk a ni!
Veteran pair hian doubles specialist an nihna nemnghetin final-ah Polish-Norwegian pair hnehin Arthur Ashe Stadium-ah an title kawl lai an humhim leh thei ta a; champion lawmman US dollar maktaduai khat zet an hum haw zui ta bawk.
Kumin kumtir lama a chipui Errani nen bawka French Open title pawh lo la dun tawh Vavassori chuan US Opel title an humhim leh hnuah, “He kum hnih chhunga kan thiltih hi a mak a ni tawp mai,” a ti.
Final-a chak zo ta lo six-times Grand Slam singles champion Swiatek leh Ruud kha tunhma lamin an la tang dun ngai lo a, khati chung khan champion lai leh doubles specialists ni bawk lakah set hnihna an la thei a, set thumnaah pawh nuamsa lo takin Italian pair kha an la siam zui leh thei a ni!
Tarlan tawh thin angin, Italian doubles specialists Sara Errani leh Andrea Vavassori kutah insem turin US dollar maktaduai khat (£740,000) a lut a; heti zat lawmman hi nikuma champion pair-in an dawn USD 200,000 (£148,000) ai khan a let nga ngawtin a tam a, hei hi a chhan chu superstar rual Swiatek, Carlos Alcaraz leh Novak Djokovic tihte hipluh an tum vang a ni a, an beisei ang ngeiin top singles player-te an inlan a, mahse, 16-team draw-a nui hnuhnungber chu Errani leh Vavassori-te bawk an ni leh.
US Open organiser-te’n singles player lar chinte an it luatah doubles player-te tan kumin US Open mixed doubles competition kawng a ping zo a, defending champion pair-te ngei ngei pawh ngaihnathiamna (wildcard) hmanga teltir hram an ni a, chuvangin, an title kawl lai an humhim hnuah Errani chuan an hnehna sualchhuah kha tournament khel tura phalsak ni ve ta lo doubles player zawng zawngte tan a hlan ve ngat a ni!
Vavassori pawhin lo thlawp zui zatin, doubles player-te aiawhtu an nih thu leh an aiawha ‘mission’ kengkawhtu an nih thu a sawi ve bawk.