US President atan Donald Trump lalut

President Donald Trump chuan ‘America-in hniam lam a pan’ chu a tawp ta tih puangin thutlukna lian tak tak a siam a, heng zingah hian US-Mexico ramria emergency puan pawh a tel.
Thawhtanni chhun (India-a zan)-a amah an lak luh zawha thu a sawiah Trump-a hian White House-a a kir leh rualin ‘a êng lam a thlen ngei’ a inrin thu a sawi a. Joe Biden-a kaihhruai kum li liam ta chhunga hun duhawm lo tak tak an tawn chu an tikir leh dawn tih a sawi.
Thuneihna inhlanna muanawm tak hman a nih hnuah Trump-a hian thupek khauh tak tak siamna tur hming a ziak nghal a. Ramria inkalpawhna awlsam lutuk tihtawpna tur te, an ram energy siam chhuah tihpun leh sorkarin inthliarna hawia thil a kalpui tihtawpna tur te a tel.
“America hun rangkachak chu tunah hian a intan a ni,” tiin US Capitol Rotunda-a a thu sawinaah hian bul a tan a. A hmun hi pawna tih tur ni mah se khaw vawh em avangin in chhungah sawn a ni.
Trump-a hian hma lakna turte a tlangpui a sawi chhuak a, heng zingah hian ramria sipai dah pawh a tel a. Gang leh drug cartel-te chu ram dang firfiak pawl tiin a sawi a, Mexico nena an inrinaa an rama luh tumten himna an dil chhung Mexico ram china an nghah a ngaih thinna, sawi hlawh tak pawh kalpui leh a tum bawk.
“Dan lova lo lut zawng zawng tihtawp nghal a ni ang,” a ti a. Thuneitute chu ram dang mi dan bawhchhia maktaduai telte an lo kalna hmuna thawn let turin hna an thawk nghal dawn tih a sawi.
“Kan ram hi hlauhawm leh min rûntu laka venhim aia nasa mawhphurhna dang ka nei lo a ni,” a ti.
Lak luh inkhawm tan hma hian Trump-a sorkar thar ding mai tura thuneitu turte chuan president a nih veleha a hming a ziah hnan tur thupek tam tak ruahman a nih thu an sawi tawh a. Heng zinga 10 chu thuneitu pakhat, ‘common sense immigration policy’ tia a sawi kaihhnawih vek a ni.
Thuneitute hian Trump-a hian pianna hmun a nih avanga khua leh tui nihna neih nghalna dan pawh tihtawp a tum tih an sawi a. Hetiang a nih chuan lehkha engmah nei lova US-a lut fate chu US-a piang ni mah se American an ni ngawt thei tawh dawn lo a ni.
Birthright citizenship tia an sawi mai hi US danpuia inziak a ni a, thlak danglam tur chuan Congress-a rorelna in (chamber) pahniha member hmun thuma thena hmun hnihin an thlawp a ngai dawn a. Thuneitute hian eng angin nge thlak turin Trump-a hian hma a lak dawn tih an sawi rih lo.
President a nih vawi hnihnaa Trump-a thu sawinaah hian US system chu ‘a zavaia thuah’ a tum thu a sawi a. National Energy Emergency puan a tum a, hei hi thuneitute chuan energy hmangtute tana hman man sang lutuk thununna tur a ni tih an sawi.
Trump-a hian ‘ram dang mite thil leina leh chhiahin kan khua leh tui a tihausa dawn’ tih a sawi a; mahse, eibar dinhmun chawi kan a tum dan tur ngaihven hle ni mah se roreltu thar tur hian lak luh a nih niah hian eng anga hma lak tur nge a sawi lo.
Trump-a hian president a nih hma khan Canada, Mexico leh China atanga bungraw lutte chu pisa a luah tan niah thawn luh man a tisan nghal tur thu a lo sawi tawh.
A tih tur a tiam hraw tak zingah Gulf of Mexico chu ‘Gulf of America’ tia thlak leh a tum a, North America-a tlang sang ber, Denali, pawh Mount McKinley tia thlak leh a tum bawk a, he tlang hming hi President Barack Obama-a’n kum 2015-a a thlak kha a ni.
Panama Canal pawh ‘lak let’ a tum a, he tuikawngah hian US lawngte hi ‘fair lo’ taka tih thin a nih thu leh China-in a thunun a nih thu a sawi.
“China hnenah kan pe dawn lo. Panama hnenah kan pe leh ang,” a ti a. “Kan la kir leh ngei dawn a ni,” a ti.
Thuneitute chuan Trump-a hian sorkar chhunga ‘DEI (diversity, equity leh inclusion) chu tihtawp a tum tih an sawi a, sorkar chuan US-a nihna pahnih – mipa leh hmeichhia chauh a pawm dawn tih a sawi bawk.
Trump-a hi an ram huna chhun lai (India-a zan dar 10:30)-ah US Capitol-ah president atan lak luh a ni a. A hnuah hian thupek eng emaw zatah hming a ziah hnan nghal.
Lak luh inkhawma thu a sawi zawhah hian chawchhun ei te, parade leh zan lama inaugural ball-a hun hmanna pathum a nei bawk.
Parade-ah hian mi 20,000 chuang an tel a, an kawng zawh hi kartawp atanga khaw vawt lutukin Washington DC a hmeh avangin Capital One Arena chhungah chauh neih turin ruahmanna siam a ni nghe nghe.
Lak luh inkhawm hi US Capitol tuala chhim theih turin ticket 2,20,000 zet siam ni mah se khaw awm danin a zir loh avang leh in chhunga neih a nih avangin hetiang zat an pungkhawm ta lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More