US rawtnate hi anmahni hlawkpui tur bik chauh a ni – Iran

US rawtnate hi anmahni hlawkpui tur bik chauh a ni – Iran
Kar li dawn indona awm tawh tihtawpna tura US rawtna chu ‘ama hlawkpui tur bik leh dik lo’ a nih thu Iranian thuneitu sangin Reuters a hrilh a. Hetih lai hian US President Donald Trump-a chuan Tehran hian inremna a siampui lo a nih chuan na taka beih chhunzawm zel a hmachhawn a ngai dawn tih a sawi ve bawk.
Iran thuneitu chuan Pakistan-in Tehran-a hnena a thlen rawtna hi, ‘Nilaini zan khan thuneitu lian leh supreme leader aiawhten chipchiar takin an thlir’ tih a sawi.
Hlawhtlinna atana thil tul a tlem a, US leh Israel hlawkpui theih tur chauh a ni tih a sawi a, muanna atana rawtna tha la awm lo mah se indawrna tura inkar a la awm lo tih a sawi bawk.
Trump-a chuan Iranian-te chu ‘mi dawr thiam tak’ tiin a sawi a, indona titawp tura anni nen inremna siam a duh tih erawh a sawi chiang lo thung.
Iran hian February 28-a US leh Israel tangdunin an beih hnuah Israel, US hmunhma leh Gulf ramte a bei ve a, Strait of Hormuz kaltlanga Middle East tuialhthei phurh chhuah a dang deuh vek bawk.
White House-a cabinet meeting neihnaah Trump-a chuan, “Tunah chuan hun remchang an nei ta a, an nuclear neih tum kalsana hma lam panna kawng thar zawh theihna hun an nei ta,” tiin Iran nena indawrna kawng inhawng mek chungchang hi a sawi.
“An duh leh duh loh kan en ang a. An tih duh loh chuan an mangchhe rapthlak ber kan ni ang a. Kan thlawh darhtir vek dawn a ni,” a ti bawk.
Inkahhai puan a nih beiseina thawm a reh leh tak avangin Ningani khan tuialhthei chu barrel khat $105-ah a kai leh a, khawvel pum huapa plastic, technology, retail leh tourism a nghawng na hle.
Trump-a hian Ningani khan Iran-in inbiaknaah duhsakna lantir nan tuialhthei phur lawng 10 chu Strait of Hormuz paltlangtir turin a rawt a, heng zingah hian Pakistan flag tar thenkhat pawh a tel a. Iran atanga ‘present’ tiin a sawi nghe nghe.
Middle East-a sipai sang tam tak tirh tumtu leh hei hian vansang atanga an beih bakah khawmuala an luh mai rinna a siam mek laiin president hian Iranian tuialhthei thunun chu an duhthlan tur a nih thu a sawi bawk a, a chipchiar erawh a sawi lo.
Thawhlehnia Iran-in United Nations-a lehkha a thawnah chuan Iranian thuneitute chuan anmahni nena nena inremna nei ‘buaina siam lo lawngte’ chu strait paltlang an phalsak tih a tar lang.
Iran nena an indawr hnuah Thai tuialhthei phur chuan strait hi a paltlang a, Malaysia pawhin an lawngte pawh kal phalsak an nih thu a sawi a, hei hian ram thenkhat tan kawng khar a hawng tih a tilang a. Spain-in strait kaihhnawiha ngenna a siam eng pawh pawm a tum niin Madrid-a a embassy chuan sawiin hei hi EU ram hnena hetiang a sawi hmasak ber a ni.
US Special Envoy Steve Witkoff-a chuan indona titawp tura inbiakna atan ‘point 15 nei chet lakna tur’ an thawn tih a sawi.
Pakistani foreign minister chuan US leh Iran inkara Islamabad kaltlanga thu inthawna inbiak neih a nih thu a sawi a. Hetih lai hian Turkey leh Egypt pawhin an inkara tel an inpeih.
US-in rawtna a neih 15-ah hian Iran-in nuclear program a neih leh a missile siam tihtawp atanga strait thununna tha taka hlan thlengin a tel.
Iran hian nakin zela sipai chakna hmanga an ram beih tawh lohna siam a phut a, a hloh tawhte rulhna pek a phut a, strait thunun a phut bawk nia sawi a ni.
Indo a tawp theih nana hmalakna a awm mek lai hian Ningani khan Iran chuan Israel chu missile tam taka kapin Tel Aviv, Haifa leh hmun dang a tum a, ram lailia Palestinian khawpui pakhat pawh a kap bawk.
Ballistic missile pakhat velin Tel Aviv hi a kap niin sipaiten an sawi a, in leh car a chhe nual niin an sawi a. Israel-a ambulance service chuan Nahariya-ah Hezbollah-in rocket-a hmar lam khawpui an kahnaah mi pakhat a thi tih an sawi bawk.
Iran-ah pawh chhim lama Bandar Abbas khawpuia chenna hmun leh Shiraz khawpui daia khaw pakhatah beih a ni a, unau tleirawl pahnih an thi niin Iran news agency chuan a tar lang. Isfahan-a university building pakhat kah nia sawi a ni.
US leh Israel thuneitute chuan Israel-in Iran Revolutionary Guards-a naval commander an that tih an sawi a, tam tak tihchhiat hmabak an la nei tih an sawi bawk.