US thuneitu ten EL Mayo man

Khawvela drug lord thiltithei ber pakhat Ismael “El Mayo” Zambada, Mexico-a Sinaloa cartel leader chu El Paso, Texas-ah US federal agents ten an man.
Kum 76-a upa ni tawh Zambada hian tuna US lung ina tang mek Joaquin “El Chapo” Guzman nen criminal organisation an din a ni.
Zambada rual hian Guzman fapa Joaquin Guzman Lopez pawh man a nih thu US justice department chuan a tarlang bawk a.
February thla khan Zambada chu US prosecutor te chuan heroin ai pawha hlauhawm zawk fentanyl thehdarhtu ah puhin thubuai an siamsaka fentanyl hian US ah opioid crisis a thlen a ni.
Mexican leh US official te thusawi ziak chhawngin Wall Street Journal chuan Zambada chu Homeland Security leh FBI tena a thla a thla man tuma operation an neih hnuah high-ranking Sinaloa member in thlawhnaa chuang turin a bum lut tiin a tarlang a. Zambada hian Mexico a airfield te enfiah tura kal tur angah a inngai tia sawi a ni. Officials te chuan Zambada chu private plane-ah Guzman Lopez-an a bum lut tiin an sawi a.
Zambada chuan a chuanna thlawhna chuan Mexico a pan emaw a tihlaiin hmar lam panin El Paso-ah a tum ta zawk a ni tiin Fox News Correspondent Bryan Llenas chuan law enforcement atanga a thudawn a sawi a.
Guzman Lopex chu US thuneitute hnenah inpe nghal bawkin Zambada a mantir chhan chu a pa man a nihnaah Zambada chu mawhphurtu anga a ngaih vang a ni, tiin Llenas chuan a sawi bawk.
US Attorney General Merrick Garland chuan thuchhuah a siamah mi pahnih te chu ‘khawvel pum huapa drug trafficking organisation a tharumthawh nasa ber leh thiltithei ber’ tiin a sawi a.
“Fentanyl hi kan rama drug hlauhawm ber a ni a, Justice Department chuan cartel leader te, an member leh thawhpui te kan community tura min hraitute man vek an nih hma chuan kan chawl dawn lo” tiin a sawi.
American prosecutor te chuan Sinaloa cartel te chu US-a drug supplier lian ber an ni an ti a. US thuneitute chuan fentanyl chu Americans kum 18 atanga 45 te thihna thlentu lian ber an ti bawk.
US Drug Enforcement Administration (DEA) te chuan Zambada lu manah hian a hma in $15 million an lo tiam tawh a.
Kum 2019 a Joaquin “El Chapo” Guzman man a niha a chungthu ngaihtuah a nih lai khan a lawyer chuan Zambada chu man a nih emaw hrem a nih hlau miah lova zalen taka a awm theih nan Mexican sorkar pum tham tiin a puh a.
“A nihna takah chuan Guzman an engmah thunun a nei lo” tia sawiin Guzman lawyer Jeffrey Lichtman chuan, “Mayo Zombado tih vek a ni” tiin a sawi.
US state department chuan Zambada chuan Mexico-ah sumdawnna a nei teuh an ti bawk a. Chung zingah chuan milk company lian tak te, bus line leh hotel te bakah real estate assets a nei an ti bawk.
Fentanyl tawlhrua puh a nih bakah hian US ah drug trafficking, tualthah, mirukbo, pawisa chheptelh leh organised crime thubuai a nei sa bawk.
May thla khan Zambada nephew Eliseo Imperial Castro, ‘Cheyo Antrax’ tia hriat lar zawk chu Mexico a lambun a nihnaah a thi a, amah pawh kha US thuneitute duhlai tho a ni.
Zambada chu khawvela drug warlord lian bera ngaih niin Americas ah ngat phei chuan amah aia thiltithei an awm lo.
Kum sawm tam tak thuneitute bumin man theihin a awm ngai lo va, tuna man a ni pawh hian Mexico ah chuan maktih a hlawh hle a ni.
Zambada man a nihna chu President Joe Biden administration tana lawmawm tak niin DEA in kum tam tak chhunga an operation hlawhtling ber a ni bawk.
Zambada chuan El Chapo nen kum 1980 chho khan Guadalaraja cartel kehchhiat laiin Sinaloa cartel a din a. EL Chapo chu an pawl hmatheh ber zawk a ni chungin mi tam tak te chuan El Mayo chu leader diktak zawkah an ngai a ni.
A nunrawng hle a, chutihrualin a innovative em em bawk a, Colombian cartel tena US a cocain leh heroin an tawlhluh theih nana sulsutu hmasa a ni bawk a. A hnuah fentanyl lam a buaipui leh zui a ni.