USA hma lam hun la chiang lo

Hmeichhe World Cup khelh mekah Ningani khan champion lai USA leh Netherlands te chu 1-1 in an inhnehtawk. Netherlands lakah an chak zawh loh vangin USA hi tla thei dinhmunah an ding a, Portugal nen an inhmachhawn zui leh ang. Champion lai lakah tlawm an pumpelh vangin Netherlands tan last 16 luh theihna kawngza zau takin a inhawng thung.
Champion lai USA leh Netherlands hi Wellington Regional Stadium, New Zealand-ah an inhmachhawn a, inkhel hmuhnawm an lan tir. Netherlands hian World Cup hmasaa an ngam loh USA lakah bul an tan tha a, goal thun hmasa zawkah an tang. Inkhel tan atanga minute 17-naah Jill Roord chuan Dutch hmahruaina goal a thun. He goal hmang hian hun rei tak hma an hruai a, champion lai lakah chak theih an beisei hman hial.
Hun rei tak chhung an si phurh sut thei lo mahse USA an bei-dawng duh lova, an khingpuite an nawr char char. Minute 62-naah Lindsey Horan chuan goal thunin an si phurh a sut ta nge nge. Goal thun belh tumin innawr dun viau mah se goal an thun belh thei lo ve ve a, 1-1 a inhnehtawk chungin an intha then.
Group E-ah hian USA leh Netherlands te hian point ve ve an hmu mek a, goal thun tam zawk USA hi hmahruaitu an ni mek. Point thum hmu tawh Portugal in pathumna an luah a, tlawm zawn tawh Vietnam an tla chiang tawh thung.
Point li hmu tawh USA leh point thum hmu tawh Portugal an inhmachhawn zui leh dawn. USA tan last 16 lut turin in draw a tawk a. Portugal hian last 16 lut turin chak ngei ngei an mamawh ve thung. Netherlands hian tla chiang tawh Vietnam an hmachhawn leh dawn a, group champion nih theihna hun tha an nei.