Usyk hmachhawn tur Parker

Last updated Jul 26, 2025 10 0
             Ukranian boxer Oleksandr Usyk chuan Pathianni kal ta khan IBF kawnghren kawl mektu Daniel Dubois knock out in a hneh a, kawnghren pali a kawl khawm nawn leh. Usyk hian tu nge a hmachhawn leh dawn tih a la chiang lo va, mah se WBO kawnghren a chuhpui tur chu Joseph Parker a ni thung.
Palian hianga boxer tha bera ngaih ni thin, pa lian zet mai Tyson Fury chuan tum hnih a hneh loh Usyk hi hmachhawn nawn leh a rilruk a, inbuatsaihna a nei ut ut. Usyk hmaa ding thei tur zingah Tyson Fury, Anthony Joshua leh Derek Chisora te hming a ri ring hle. WBO kawnghren humhim tura Parker hmachhawn lova, mi dang hnek a thlang zawk a nih chuan WBP belt hi chhuhsak a ni dawn thung. WBO chuan Usyk leh Parker te indawr fel hun atan ni 30 chhung an pe. 
New Zealand boxer lar Joseph Parker hian WBO interim belt inchuhnaah March 2024 khan China palian Zhilei Zhang a hmachhawn a, hnehna a chang. February thla khan IBF champion Daniel Dubois nen inhmachhawn tur an ni a, an inhnek hun a thlen dawn tepah Dubois hi dam loh vangin a inhnukdawk. Dobois a inhnuhdawh vang hian chawpchilh taka an koh Martin Bakole a hmachhawn a, knocout in a chak. Boxer lar leh tha zawk Oleksandr hmachhawn theihna hun remchang siam sak a ni zui ta a ni. Tarlan tawh angin Usyk hian Parker hi a hmachhawn duh lo ve thei tho. Kawnghren pali a kawl khawm hmasak tum pawh khan IBF belt chuhpuitu tur aia Tyson Fury hmachhawn nawn leh a thlan vawngin a kawnghren chhuhsak a lo ni tawh nghe nghe.
Usyk hmachhawn thei dinhmuna ding mek Joseph Parker hi kum 2016 - 2018 chhung khan WBO champion a lo ni tawh. Tyson Fury kal san WBO kawnghren chu Andy Ruiz Jr nen an inchuh a, hnehna changin World champion a ni. A kawnghren hi tum hnih a humhim hnuin Anthony Joshua lakah tlawmin a kawnghren a hloh ta thung. Hun eng emaw chen hnuah  world champion nih leh theihna hun tha a nei thei dawn a, Usyk a hmachhawn a nih chuan a hlawh pawh a nei tha viau tura ngaih a ni.
Kum 33 mi Joseph Parker hian inhnek vawi 39 hmachhawn tawhin vawi 36 a chak a, tlawm zawkah vawi 3 tangin a khingpui mi 24 zet a knockout tawh. Hetihlai hian kum 38 mi Oleksandr Usyk chuan inhnek vawi hmachhawn tawhin a chak vek a, a khingpui mi 15 a knockout tawh thung. Parker hian tlawm nei lo Usyk hneh theitu hmasa ber nih tumin tan a khawh ngei ang.