Uttarakhand-ah sakhaw hmun bula zu zawrh khap

Uttarakhand-ah sakhaw hmun bula zu zawrh khap
Uttarakhand sorkar chuan kum 2025-26 atan excise policy thar a pawm a, sakhaw hmun hnaiha zu dawr zawng zawng khar a ni dawn.
Thuneitute chuan sakhaw hmun hnaiha zu dawr licence pek zawng zawng chu excise policy hnuaiah hian ennawn vek a ni dawn tih an sawi a. Thawhtannia Chief Minister Pushkar Singh Dhami-a kaihhruai cabinet thutkawmin policy hi a pawm a ni.
Sakhaw hmun hnaiha zu dawr hawn chu khar a ni ang a, zu hralh chu an thunun lehzual dawn tih Secretary (Home) Shailesh Bagauli chuan a sawi.
Policy thar hian zu dawr chu langtlang zawka tih tur a ni a, hna nei lo tan hna thar tam zawk a siam theihna turin ruahmanna an siam dawn tih a sawi bawk.
Tual chhunga lo neituten zu siamna hmuna zu siamna atana hman theih thil an thar chhuahte tam zawk an hralh theihna tur pawh policy tharah hian telh a ni.
Licence pakhat hmanga dawr tepeng siam leh metro liquor sales system chu tihbo a ni ang a, maximum retail price aia sanga zu hralhtu dawr licence chu tihtawp theih a ni dawn bawk.
MRP hi departmental store zawng zawngah pawh hman a ni ang a, hei hi zu in mite tana tih a ni.
Excise department tana 2025-26 chhunga sum lak luh zat tur bituk pawh ennawnin Rs vaibelchhe 5,060-ah siam a ni a, hei hi tun hnai kum hnih liam ta chhunga department-in sum a lak luh mila chhut a ni tih Bagauli-a chuan a sawi.
2023-24 chhung khan Rs vaibelchhe 4,038.69 hmuin an hmuh tura tuk chu Rs vaibelchhe 4,000 a ni a. 2024-25 chhung khan Rs vaibelchhe 4,000 chuang hmuin hmuh tura tuk chu Rs vaibelchhe 4,439 a ni tih a sawi.
A hlawm tama zu hralh phalna chu Uttarakhand-a cheng nghet hnenah chauh pek a ni tawh dawn a, hei hi tual chhung mite ei leh bara chawi kanna tura duan a ni.
Tlangrama winery-te chu thei atanga wine an siamah kum 15 chhung chu excise duty awl an ni dawn bawk a. Hei pawh hi lo neitute dinhmun chawikanna tur atana tih a ni.
Zu siamnaah sum tam zawk thawh duh an awm theih nan export duty pawh tihhniam a ni a. Tlangrama malt leh spirit siamna hmunte chu hamthatna siamsak an ni bawk.