Vaccine la thei 8389 awm

Zeng hri dan beihpui thlakin March 5 hian National Immunisation Day hman a ni dawn a. Kolasib district bikah naupang kum 5 hnuailam, he hri danna la thei naupang 8389 pek tum a ni.
Kolasib District Task Force on Immunisation (DTFI) chu an chairman, district bawrhsap John LT Sanga hoin Thawhlehni khan an thukhawm a. Zeng hri danna kaa thlawr chi (oral polio vaccine) pek dan tur an rel. March 5-ah hian khaw hrang hrangah booth 122, transit 2 leh high risk area (HRA) 9-ah hri danna pek a ni anga, hemia pek bak chu March 6 atangin in tinah lutin hri danna hi pek a ni ang.
Kum 1995 March 16 khan National Immunisation Day hi India ramah a vawikhatnan hman a ni a, zeng hri danna pek beihpui thlak tan a ni. 2014 March 27 khan World Health Organisation chuan India chu zeng hri awm tawh lohna ram (polio free) ah a puang a ni.
2011 January 13 khan Howrah West Bengal-a zeng hri vei hmuh chhuah chu India rama zenghri vei hmuhchhuah hnuhnun ber a ni a. Tun thlengin zeng hri ni thei awma rinhlelh chu endik turin hmunpui lamah thawn zel a la ni. Kum 2023 chhung khan Kolasib district atang hian zeng hri ni thei awma rinhlelh sample 5 chu Kolkata-a thawn niin, zeng hri a ni lo tih finfiah a ni.
Kum 2022 NID-ah Kolasib district-ah zeng hri danna pek tur target 8768 awmin, booth 107, transit 2, HRA 9 leh house to house activity kaltlangin naupang kum 5 hnuailam 9121 hnenah zeng hri danna pek a ni a. Target aia tam (104.02%) pek a ni.