Vaihlo laka him tura thalaite
zirtir beihpui thlakna bul tan
National Health Mission Mizoram hnuaia National Tobacco Control Programme buatsaih Tobacco Free Youth Campaign 2.0 chu Health minister Lalrinpuii’n a tlangzarh.
Zuk leh hmuam hluar lutuk avanga cancer vei kan tam phah tih Health minister hian a sawi a. Thangtharten he natna thlentu pakhat – vaihlo chu hnar ngam a, an fihlim theihna tur chu kan zavaia mawhphurhna a ni tih hre thar turin mipui a ngen. Zuk leh hmuam kaihhnawiha kan fihlim theihnan sawrkarin sum tam tak a seng thin, tiin, ram hmasawnna thlen tur chuan a ram mipui vantlang an hrisel a pawimawh a, vaihlo ching dawklakten sim a, la tichhin lote tihchhinna chuan ngawlveina a thlen thin tih hriaa ti chhin lo turin a chah.
“Tobacco free” zirna in (institution) a nih theih ngeinan hma la theuh tura a sawm bakah department hotute chuan an enkawl department chu vaihlo awm lohna hmun a nih theih nan khawng taka dan kengkawh turin a chah bawk.
Mizo zingah vaihlo zuk leh hmuam hmang kan la tam hle a. Global Adult Tobacco Survey 2016 – 2017 tarlan danin, zaa 58.7 in vaihlo an hmang tih sawi a ni. Mithiamte chuan vaihlo, zuk leh hmuam hi “ruihhlo tihna kailawn” an ti hial tih a sawi a ni bawk.
COTPA (Cigarette & Others Tobacco products Act) 2003 dan hnuaiah tih phal loh inhrilh thar a ni a. Tunlaia lar e-cigarette (vaping) khapna dan – Prohibition of Electronic Cigarettes Act (PECA) 2019 pawh sawilan niin, he dan hian e-cigarette siamchhuah, khawlkhawm, phurhchhuah, sawimawi, ram dang atanga lakluh leh zawrh khap tlat a nih tih mipuiin an hriat a pawimawh tih sawi a ni.
e-cigarette (vaping) kaihhnawih PECA 2019 dan hnuaiah hian dan bawhchhiat azirin Rs. 50000 atanga nuai 5 thleng chawitir theih a nih bakah kum 5 thleng lung in tan theihna a ni tih a sawi a ni bawk.
Tobacco Free Youth Campaign 2.0
hnuaia tih tur:
# Mipui hnena a tam thei ang ber awareness campaign neih
# Tobacco free educational institution a tam thei ang neih belh
# Tobacco Free Village a tam thei ang neih
# Cigarette & Other Tobacco Product Act leh Prohibition of Electronic Cigarette Act hmanga a tam thei ang activity neih
# Kuminah nikum lama tel lo target an dah thar chu social media hmanga vaihlo that lohna zirtirna a tam thei ang ber puan