Vairengte-a Revenue department kaihhnawih tih awlsam dan sawiho

Vairengte-a Revenue department
kaihhnawih tih awlsam dan sawiho
Vairengte Civil Sub Division-ah Revenue department kaihhnawiha mipui mamawh tih awlsam dan sawihoin Inrinni khan Land Revenue & Settlement minister B Lalchhanzova chuan SDO (Civil) bakah village council leh tlawmngai pawl hruaitute a sawipui.
Minister chuan Civil Sub Division ho chu revenue kaihhnawiha hma an lakna tur chi ah thuam chak an tum a, Vairengte chu ramria awm a nih bakah SDO (C) office changtlung sa a nih avangin hmalakna hmasaah neih an tum tih a sawi.
SDO (Civil) office chu Revenue Court-a puan a nih tawh bakah Sub Registration office atana puan an ni tawh a. Hei hi a taka kalpui a nih theihnan an department chuan chak takin hma an la mek a. SDO Civil Vairengte office-ah surveyor, revenue inspector, DEO leh clerical staff a theih anga dah thuai an tum tih a sawi.
“Hei hian ram teh, ram buai chinfel leh ram hming thlak leh dahkham kawngah Sub Division mipuiin hun leh sum tlem zawk senga thil an tih theih phah dawn a, chu chu ZPM sawrkarin a tum, mipui awlsamna siam kawngah hmasawnna nasa tak a thlen a beisei a ni,” B Lalchhanzova hian a ti.
Tuna thukhawm hi inrawnkhawm bultanna a ni, tiin, LR&S secretary, director, Kolasib bawrhsap leh settlement officer-te nen kokim zawka he hmalakna kalpui dan tur sawihoa thutkhawm thuai a ni dawn tih a sawi a. SDO (C) chu revenue hnathawh tih chak kawngah LR&S hnathawhna district hoah chuan a tahtawla tih zel tur a ni tih a sawi a ni.