Valencia lakah Real an tlawm

Inrinni zan khan Spanish La Liga 2024-25 khelh chhunzawm a ni a, hmahruaitu FC Barcelona hnaih leh zual tura chak mamawh Real Madrid chu an mikhual Valencia hneh lovin an tlawm. Real Madrid an tlawm lai hian Barcelona pawhin point thum an hmu thei bik lova, an mikhual Real Betis nen an inhnehtawk ve bawk.
Pahnihnaa awm mek Real Madrid hian season kal meka chetha lova, 16-naa awm mek Valencia chu Santiago Bernabeu-ah an mikhual a, Los Blancos tan an mualah chak a harsa lo tura ngaih a ni. An mualah chak theih beiseina sang tak nei bawk mah se goal chhuah hmasa zawkah an tang teh tlat a. An si phurh hmasa sut bawk mah se hun tawp dawna an goal chhuah erawh an sut thei tawh lova, an mualah mak tak maiin an tlawm.
Santiago Bernabeu-a lenglut Valencia hian bul an tan chhe viau a, penalty an chawi thuai. Minute kuana leka Kylian Mbappe penalty hlawhchhuah chu Vinicius Junior chuan a pet goal lova, mikhual team an him hlauh. Penalty an dan hlauh vangin Valencia hi an phur a, tha taka khelin goal pawh an thun thuai. Inkhel tan atanga minute 15-na lekah Mouctar Diakhaby chuan corner atanga ball kal chu chiang zetin a tauh goal a, hmahruaina goal a thun. Hma takah goal an thun vangin hlau leh khur chunga champion lai Real Madrid hmachhawn Valencia in inrintawkna thar an nei a, phurna sang tak nen an inlan zui ta chiah bawk. Real hian an si phurh sut tumin tan an khawh nasa hle a, an vanduai a kaltluang. An si phurh sut bawk mah se offside vangin an goal hnawl a ni a. Mbappe chuan hnai zet atangin goal bar a pet per hlauh bawk. Hlauhawm siam bawk thin mah se a hmawr an bawk fuh thei lova, hnufual zawk ni chungin chawlhlawk an hmang.
Second half-ah goal thun ngei tumin Real hian tan an khawh zui nghal chat a, si nghak Mamardashvili an paltlang zo lo leh phawt. An khingpuite na taka an nawrh an hlawkpui a, goal an thun ta nge nge. Corner atanga ball kal chu Vinicius Junior chuan hnaite atangin a pet goal a, minute 50-naah an si phurh a sut. An si phurh an sut vangin an phur a, an mualah chak tumin thapui an thawh zui nasa hle. Real tan hian Mbappe hlauhawm zui viau mah se a vanneih ni a ni lova, Valencia lakah a teuhin a thamral. Real hian goal thun theihna hun tha nei zui bawk mah se si nghal tha zet mai Mamardashvili an paltlang thei tawh lo.
Real Madrid in na taka an nawr karah vanneihthlak tak him hram hram thin Valencia tan hun pek belh tawp dawn hnaiah hun tha a inherchhuak ta nawlh thung. Counter attack hmanga an nawr an khingpuite an nawr let thut hnuin Hugo Duro chuan minute 90’+5-naah chiang zetin tauh goal a, hma an hruai nawn lehna goal a thun. He goal hi hun tawp thlengin an venghim a, team lian Real Madrid lakah hnehna lian changin, point thum hlu tak an hmu.
Barca an chak zo lo
Real Madrid an tlawm hnuin table-a hmahruai mektu FC Barcelona chu an mualah an inlan chhunzawm a, point ruka hmahruai fal theihna hun tha an nei. An mikhual Real Betis lakah bul tan tha viau mah se hnehna an chang zo bik lo thung a, point rukin hma an hruai fal thei bik lo.
Barcelona tan hian Gavi chuan inkhel tan atanga minute 7-na lekah hmahruaina goal a thun. An mualah bul an tan that vangin awlsam taka chak thei tura ngaih ni mah se goal an chhuah zui ve thuai thung. Real Betis tan hian Natan chuan minute 17-naah goal thunin an si phurh a sut a. Minute 17 chhung leka goal hnih lut bak hi hum pumin goal a luh belh thei tawh lova, uiawm takin Barcelona an chak zo lo.
An mualah chak zo lo mah se FC Barcelona hian Real Madrid nen an inkar chu point khatin an tizau hret a, point liin hma an hruai. Khelh hmabak khelh riat an la neihah champion ngei tumin tan an khawh zui dawn a. Real Mdrid nen champion tuma an inum boruak hi a ngaihnawm chho telh telh dawn niin a lang.