Valencia muala chak zo lo Barca

Spanish La Liga Inrinni zan inkhel pakhatah Valencia khelmual lut Catalan team-in point hnih hloh thenin 1-1 draw hlawhchhuak mah se inkhel dangah table-a pathumna luahtu Atletico Madrid an tlawm avangin Barcelona hian Madrid club nekchhuakin top three an luahlut zui ta tho.
Xavi Hernandez-a team hian chak an la harsat chhunzawm zel a, kartawp result kha a zawna game thum chak ni hmel an hmuh zawh lohna ni tawhin, an game hnuhnung pahnihah an tlawm a, pakhat chu league match lama 2-4-a Girona an hneh loh kha niin, Champions League group stage-ah 2-3-in mualneitu Royal Antwerp an ngam lo bawk.
Vawihnih tlawm zawn hnua chak duhna thinlung sosang tak nei chho tura ngaih Nou Camp club hian Valencia khelmualah goal thun ahmasain, second half tir lam minute 55-ah Raphinha cross chhawrtangkaiin Joao Felix chuan hnai set sawt atangin mikhual team hmahruaina goal a khung a, chak ni hmel an hmu ve ta nge nge dawn em tia kan thlir chhunzawm zel laiin minute 70-ah Hugo Guilla-mon chuan tuihnai zeta goal khungin Valencia siphurh sutna goal a tilut a, goal dang luhbelh loin team pahnih an inhnehtawk a, khualkhua atanga an point khat hawn hmangin Xavi team-in league table-ah pathumna an luah chho zui thei ta tho a ni.
He thu buatsaih laia khelh khata la khel tlem zawk Girona (table-a pahnihna) nena point ruk laia la inthlau Barcelona hian Valencia khelmual hun tawp dawnah goal thunna hun remchang hmu nual mah se Valencia goalkeeper khel tha lutuk Giorgi Mamardashvili an paltlang zo lo a ni ber.
Mamardashvili hia substitute Ferran Torres goal tur a dan zawhah hnai tak atanga Raphinha goal tur a tithuanawp a, chumi zuitu Barca chance neih leh chu line atangin pui zetin a dang zui leh a, Yarek Gasiorowski tan a hrilhhaithlak hle tura ngaih a ni!
An kawtkaia an point khat thawh-chhuah hmangin Valencia chuan league game 17-ah point 20 an hmu tling chiah a, table-ah pakuana atangin 10-na an luah chho a, Rayo Vallecano an luahlan.