Valentine’s Day-ah lehkhabu

‘Tunlai chu lehkha chhiar hi kan thatchhe tlang a,’ han tih mai hi a awl a, lehkhabu hi a hlu ta lo viauah pawh a ngaih theih ang. Mahse a zuartute thulak erawh a dang – lehkhabu kan ngaihlu, thalaiin an chhiar tih hi an hmuh dan a ni. Chutiang chu an rinthu a ni lo a, a taka an tawn, an hmuh dan tak tak a ni.
Zoramah Valentine’s Day a lar telh telh a, thalaiin an hmang uar telh telh. Thil an inpe a, hemi ni-a inpek awm taka ngaih pawh a awm ang. Lehkhabu zuarte chuan Valentine’s Day-ah hian thalaiin lehkhabu an inpe sup sup an ti tlat asin.
Kum li kum nga vel liam ta atang khan thalai, social media hmanga lehkhabu zuar an rawn chhuak a, an hmanrua ber chu instagram a ni. Facebook leh whatsapp pawh an hmang tho. Lehkhabu thlalak an post a, chutiang chuan an zuar thin. A lei duhte hnenah kalin an pe thei a, anmahni’n an pek bakah chutianga pe tur chuan thalai an ruai thin. A remchan dan ang angin lehkhabu dawr an nei tel fur bawk. Chutianga lehkhabu zuarte chuan Valentine’s Day lai hian an inhralh tha tih an sawi a, thalaiin lehkhabu an lei nasa an ti.
“Kan hralh zat hi a pung nasa, a zuang dawrh ti hialin a sawi ngam ang,” a zuar pakhat chuan a ti a, “Kan inhralh tha, a hma chawlhkar atang khan lehkhabu lei an pung,” mi dang pakhat pawhin a ti.
Social media hmanga lehkhabu zuar pakhat chuan Valentine’s Day pualin chawlhkar khat chhung an lehkhabu engemaw zat an titlawm a, an inhralh tha lutuk kha mak an tih zawk hial thu an sawi.
Lehkhabu zuar dang pakhat chuan gift box an siam a, pen leh pencil te, stationery thil hrang hrang an dah sa bakah, chutah chuan an lehkhabu zawrh zinga a leitute duh ber kha an dah a, chutiang chu Valentine’s Day thilpek atan thalaiin an lei sup sup. A ni-ah phei kha chuan an dawr, hmun lun lai ni lova mi-ah thalai an khat mup mup a ni awm e.
A zuar dang pakhat chuan Valentine’s Day pualin ni thum chhung a man an tilawm a, lehkhabu a mala lei theih leh a hlawma lei theihte an siam! A hlawma lei theih pawh a man to deuh mah se an hralh zo rat!
An dawra kala lei, mi pek atana lei an awm a, chawlhkar liam taah khan an dawr hi a hma aiin a lun hlawm. An hnenah hian a chah theih bawk a, a chahtute ina an pek theih bakah, an tih dan lar deuh chu, mi tu emawin a mi pek duh tan khan lehkhabu a chah a, chu chu a zuartute’n delivery service ruaiin an lo peksak thin. A petu hian a dawngtu a hrilh lawk lo a, an tunlai tawngin an in-surprise thin. Social media-a lehkhabu zuarte chuan chutiang chu tun hnai kum thum kum li velah a lar a, thalaiin an uar a, an inhralhna ber pakhat a ni tih an sawi.
Dawrpui pheia lehkhabu dawr pakhat chuan Valentine’s Day thilpek atan Bible an hralh hnem ber thu an sawi a, a leitute hi thalai vek an nih thu an sawi. Social media lama lehkhabu zuar, Bible kawlte pawhin Bible an hralh that thu an sawi.
Krismas dawnah social media-a zuarte leh lehkhabu dawrte’n lehkhabu an hralh tha thin a, Krismas liam taah pawh khan an mak an tih khawpin an inhralh tha. Mahse Krismas bazar hi chu a hun a rei a, Valentine’s Day bazar chu ni hnih ni thum emaw a ni mai a, Krismas bazar-a an hralh zat chu an pha lo tih an sawi hlawm.