Van ruahtui khawl vangin Rs 500 chawi…

Aizawl khawpui tuilaknaah harsatna hrang hrang a thlen avangin van ruahtui khawl kawngah thahnem ngai turin sawrkarin mipui a fuih a. Chu chu thenkhatin bawhzuiin ruahtui khawlna tur tuizem te an lei belh a, ruahtui an dawhkhawl ta ngei a.
Sawrkar thu zawma thahnemngai taka ruahtui khawl khawmtu zinga pakhat chuan harsatna a tawk ta tlat mai a. Van ruahtui a khawl khawm that theih tak em avangin, PHE atanga tuilakna meter chu a vir hman ta lo a. Chu chu tui bill lam buaipuitute chuan, ‘tui meter a vir loh avangin meter chhia angin charge tur’ an ti ta mauh mai a ni awm a. Ruahtui khawltuin thil awmzia a han sawi ngial pawhin, tui meter chhe lo pui kha, a chhia angin Rs 500 an charge ta tho a.
Ruahtui khawltu hian a sawi dan chuan, dan ang chuan tui bill hi, meter a vir emaw, vir lo emaw, minimum charge Rs 220/- a ni thin a ti a. ‘Tui meter chhe hauh si lo, a vir loh vang maia a chhia anga min charge ta tlat hi ka hrethiam lo’ a ti nghe nghe a ni.
Ruahtui khawl khawm taima tura infuih laia a lehlamah ruahtui khawl that avanga tui meter vir ta lo avanga Rs 500 chawi zel a ngai a nih chuan mipui phurrit siamna a ni. A kaihhnawih mawhphurtute lam hian heti lo deuha a tihdan tur an dap chhuah a pawimawh dawn hle. Tui meter hi tihvir hrim hrim a ngai a nih chuan, ruahtui khawl khawm duhte pawhin hun rei lote chhung chu han tivir mai se a harsa lo ang. Chu chu mipui nawlpuiin an hriat miau si loh chuan, inhrilhhriatna kawngah tanlak deuh a ngai niin a lang.
Hetih lai hian, ruahtui khawl chungchangah a sawrkar ang pawha hmalakna tur tam tak a awm a, chu chu thlai chingtute tana ruahtui khawlkhawmna tur siam hi a ni. Ruahtui awm lai chauha thlai chin theih hi kan kal pelh a hun ve tawh a, ruahtui a tlak loh lai pawha thlai chawmna tur van ruahtui lo dawhkhawlna tur hi sawrkar hian kuthnathawktute hi a ngaihtuahpui a pawimawh tawh. Infuih ngawt lo deuh hian, ‘heti hian i ti ang u’ tia hma hruai turin sawrkar hian ngaihtuahna thar hmang chho zel thei se a duhawm hle a ni.