Vangchhia pipu hmunhlui enkawl zuina tur dawng

Sawrkar laipui Ministry of Tourism hnuaia Swadesh Darshan leh PRASHAD Scheme hnuaia project thar 43 khuhhawn leh project zawh tawh 9 hawn pualin Ningani khan Srinagar-ah programme siam a ni a. Prime minister Narendra Modi chuan a hawng.
He hun hi India ram hmun hrang hrang 52 atangin inbiak hmuh theihna kaltlanga zawm a ni a. Project thar kalpui tur zingah hian ‘Development at Vangchhia in Champhai District under PRASHAD’ chu Mizoram atangin a tel a, Mizoram atangin Govt. Champhai College atangin programme hi zawm a ni.
He hun telpuitu Champhai district bawrhsap James Lalrinchhana chuan tourism chawilar chu an district hmathlir tam tak zinga lian ber zing ami a ni, tiin, tourism chu district leh state ecomomy chawisang thei a ni tih a sawi. Mizorama pipu sulhnu tam ber chu Champhai district-a awm a nih thu te, North East India-a grape wine siam chhuahna nei awmchhun a ni te, sik leh sa nuam leh hmunhma mawi tak nei a nihnate chu tourism chawilar nana remchang tak a nih thu a sawi.
Swadesh Darshan leh PRASHAD Scheme hnuaia Vangchhiaa pipu hmun hlui leh a chhehvel enkawlna atan hian Ministry of Tourism sum vaibelchhe 5.59 senga thawh tur niin, Tourist Information Centre, a enkawltu awmna, multipurpose hall, cafeteria, choka leh riahna (dormitory), ni zung chakna hmanga kawlphetha lak, ruahtui khawlna, bawlhhlawh sawngbawlna leh thildang ruahman a ni.