VANGPUI KAN THLENG E

Lalhmangaiha Sailo
Holy Cross Bakery
9436360275

Sawrkhar thar hmalakte thlirin ring kan fan awk awk a, thahnem ngaizual deuh tan te phei chuan hma an la chhah lu deuh lo maw aw….!! tiin kan lo ip deuh zawr zawr a, rin ai tak erawh chuan Hma an chhawp chho felin tan an la nasa bawk a a lawmawmin, a ropui tak zet zet a ni. Tun ai hian Hmangaih leh duhsaktute thurawnte hi te lua tih awm lovin han dawngsawng hman thin phei se zawng “Kalphung Thar” zet chu tiin kan dingdihlip awk awk ngei ang le.
Heti chung hian Kut hnathawktute lam pawhin hma kan la chhah deuh lo maw tih turin Sawhthing leh Hmarcha tan te Lo kan pawm zauh phah deuh a, Kum hmasa lama kan hotute Ramtheh dan fel tawk lo kan ti dawn nge, anni khan ram tha lai lai kha an zuan emaw tih turin ram an theh a, ram a kan chhiat nasat avangin kumin hian Kangfim ram nei kan tam a, lo lah chu a har phian leh nghal a, a hun takah Lo kan hal hlauh zawk a, a kang tha phian a, thlai erawh kan thar tha phian mai thei. Hetih laia min lo sawisel sek a, in thlawhhma a khawro lutuk, hawpkhawp pawh in thar lo ang lo ti sek lah bo lo.
Hnuhpui em pawh la zawh hma, Vaimim thar hma chi Vailiankhama an tih tak ngial pawhin Chhawn pawh a la thlak lo a, Vau hrul rawbul sawntlung pawnga, kangvar tuka Maian tuh (lawi) pawh a la arbawm em lo a, fanghma leh dawnfawh chenin, a parpu a khang pawh la thlawn lo a la ni a, kan Sawhthing hmun erawh thlam char lam mual a tám tan ve a, horticulutre department hotu rual thlengin a hetia min vilpui tlat hi chuan buaipui tham te chu kan thar mahna, hetih laia kan hmuingil leh kan hlawk lutuk zawk ang tih hlau ni awm taka min lo thlir hi chu a tha lo. Ramhlui Zia ni awm tak a ni.
Kan ti nek neka VANGPUI kan thleng dawn ta reng mai, HNUH HRAM chu Hnuhpui ai em kha chuan a ziaawm a. Fanghma tuai leh Dawnfawh chenin a khat tawkin Hlo chhehna Thingluang Sirah te lak tur a awm ta zauh zauh mai. Thlam bul vel Sap Pangpar, Nuaithang rawng êng leh sen inpawlh tawka lo par leh ZAMZO (Zo archhuang) pawh par mai turin ziktawp kau a thleng a, thlam chhak Kawnghrul chho a Thangpuii Vaimim thar tlai chi tuh pawh a kawm leh kau a ro thit thet tawh a, chawhnu bun paha han keh loh chi a ni tawh lo.
Chawfak chhun chawlh laia chhim lam thlifim tlehin buh hnah hring dup a rawn chhem chhawk awlh dul dul te chu a hmuhnawm in, a hlimawm takzet zet a, a khat tawka HNUHHRAM thlawh hun laia hmaih palh ni ngei tur MAU HNUH BUH aia sang mah lo lang, zauh zauh te chuan LO ZAWH NI min nghahhlelhtir phah zawk a.
Lawm rual chawfak lai maian baia berul, bawkbawn, bawrhsaiabe leh lengser, anthur thlak, tui tlem te thlit hnua thlam chhuat rualrem laia chawfun theh chunga han bun khuk vat vat mai te chuan ril a ti tamin chaw ei a tui a, five star hotel a ngai chuang lo. Chaw ei khama thlam namthlak ban leh chár lam bang nghenga meizial zu chunga thingpui sen YMA No tlang khawk ngei maia han in leh zet phei chu pui tak a ni. Han hawi kual ila Vangpui lo zawh a hnai tih hriat fahran in, Vaua Khaupuikung te pawh an hnah chu an rau tan thit thet a, thlam chár lam Zawng Kham Ngawpuia Dawlrem leh Rengchal hram pawh a hriat theih a, thlam vel Perhpawng te pawh in Vangpui lawm turin lamtual an chhir mam tana Khuangbai leh Khuangchilrit thlengin zan thim hma hmain thlam tlaitlanah khuang an beng tan a, hengho ten VANGPUI Lawma an thim hlim zai vawr (Hram) ngaithla tura zan khat tal Ram riah chu, a tih chi in concert ropui tak neihnaa tel ang kan ni.
GANDHI MEMORIAL HIGH SCHOOL CHAMPHAI
GM High Sikul Champhai Alumni Whatsapp Group atanga ka lo hmuh danin Kumin Kumtawp lamah hian PLATINUM JUBILI an hmang dawn ni awm takin ka lo hria a. High Sikul ka rahna (luhna) hmasa ber pawl sarih leh pawl riat ka zirna sikul a ni a, tukhaw hriat mah ni suh ila, ka lung a ti leng a, kum tin mai hian, kum tawp Vangpui alo thlen a, thingtlang LO ZAWH thawm a lo than tawh hi chuan GM High Sikul kan kal ve lai hunte min hriat chhuahtir thin. Ka pawlpui leh thiante zawng zawng deuhthawin mual min liamsan hnuin, hetih hun lai ngaihtuaha lung tileng thintu leh kan sikul (GM High Sikul) min hriat chhuahtir thintu tlem azawng Platinum lawm nan kan tarlang ve teh ang aw.
Kum 1952 Pawl sarih zir tura thianpa J Lalhmachhuana Khawhai nen Champhai kan han thleng chu, Champhai chu ropui kan ti teh a sin. Rangva in chung leh darthlalang tukverha vuah pawh la hmu ngai lo tan chuan damdawi in leh Inspection Bungla chung Sen vut leh a bang thingphel te kan hmu chu ropui kan tiin kan thlek ngun teh a sin.
High Sikul hmun tlem laih zawla pawl 7 leh Pawl 8 room leh office tê reuh tê chauh a awm a, sikul dar erawh kan nei ring khawp mai. Indopui 2 na hun laia Tuikhiang ruama Burma rama Japan motor wheel rim a hman tangkaina awm pawh hre chuang lem loa Pu Ralauva (Biakzami) Pa te han phurh a ni a. Office varanda-ah khai in, Pu Lalkhuma chawkidarin thirbung Tubauh-in a vaw thin a, a ring thin khawp mai.
Pu Saizahawla chauh zirtirtu kan nei a, a indaih lo thin khawp mai. Zing thawh veleh Kahrawt field sirah in a sa, a laklawh deuh tum phei hi chuan sikul kan tan tlai thin khawp mai, chuti chung chuan I.A Exam turin a inbuatsaih a ni. I.A Shillonga a exam thla hnih zet chhung phei chuan Zirtirtu kan nei lo a Pu te, Dr Doliana leh Pu Hmingdailova (Patea) Dahrawk SIB hotupa ten ni tin an office hna pawimawh zualte an thawh zawh hnuin min rawn ho thin. He mite pahnih GM High Sikul tana an inpeknate hi a ropuiin, hriatreng leh chawimawi an phu tak meuh meuh a ni. Chu mai a la ni lo, High Sikul rap chin tawh mikhual kal vel kan hmuh te hi chelh dingin ni hnih khat tal pawh class min laksak turin kan sawm thin zuk nia.
Kan Sikul chhak lawkah Pu Thangchuanga Compounder te nupa an awm a, fa an nei lo a, an hulharin an felfai a, hetih hun laia khawsak felfai leh changkang pawl niin ka hmu. VATAWK Var nupa lian zet mai Hram ring em em mai hi an vulh a, chhun Dar 12 a chaw an pek hun tawh hi chuan an hram ring zual emaw tih turin an kak loh loh thin, hetih hun tawh hi chuan chhun chawlh a hun e tiin kan lo za ve sek tawh thin. Sana te hi tuman bun emaw nei ve hlawm hek lo i – awm pawh nise en pawh en thiam lo kan ni ta hlawm ve ang.
Kum 1952–53 Batch ho te kha Pawl 9 class hawn a la nih loh avang khan Govt Mizo Sikul Aizawl lamah kan chhukthla deuh zel hlawm a, tun hunah mite hriat ni lem lo hlawm mahila Ex-GM High Sikul Student erawh kan la inti ve fan a, tuna la dam ka hriat tlemte Pu F Hmingthanga MCS Republic Veng, Pu C Chawngkunga Thakthing Veng, Pu J Lalhmachhuana Mission Veng leh Pu Lalhmangaiha Sailo Zotlang te hi, Platinum Jubilee-ah tu khaw hriat tur leh tumah hriat pawh han nei hlawm dawn lem lo mah ila tel ve ta ngawt ila, kan hlim ang nge kan mualpho mai lawng maw te ka ti mai mai a. Officer lian pui pui leh MLA, Minister hlui leh Minister ni mek karah, Putar, Tiang hawl kaihhruaitu neilo phei chuan kan zahpuiawmin, kan mualpho mai lawng maw tiin kan lo thlir e.
Lung erawh a leng a, Vangpui boruak leh Thlasik rim lo nam tan nen, Champhai zawl Tuipui dung Suartluana HAWLHRAWK lian tak nen Champhai Nghate kan hawlh a, hawn paha KEILUNGLIAH LUI hnar thleng dawn a kan zawh leh ka vahpui thiante R Khawbula, Lalmawia, Vawmsuala te leh Rohmingthanga te lo awm tawh lo bawk nen, Lunglengin kan han kur ang nge hlim takin kan han tel dawn em ni zawk ti chungin, thangthar Ex-GM High Sikul Student la valai deuh leh chhangchhe deuh tawh te tan thlengin ka rawn CHAWKPHUL ve a ni e.