Vantlang tan J&K-a Asia tulip huan lian ber hawng

Vantlang tan J&K-a Asia tulip huan lian ber hawng
Jammu & Kashmir-a Dal Lake leh Zabarwan Hills inkara awm, Asia khawmualpuia tulip garden lian ber chu Nilaini khan vantlang tlawh theih tura hawn a ni a, hei hi Kashmir phaikuama khualzinte tlawh hun atana thil thar a ni.
Indira Gandhi Memorial Tulip Garden hi vantlanga tlawh theih turin Jammu & Kashmir Chief Minister Omar Abdullah-a’n Nilaini khan a hawng a ni.
He huan hi Ghulam Nabi Azad-a khan kum 2007 khan chief minister a nih laiin a hawng a, khualzinten nipui leh thlasika Jammu & Kashmir tlawh hun laia tam zawk an hip theih nana tih a ni.
Siraj Bagh tia hriat thin huanah hian tulip rawng chi hrang hrangte an par vul hun lai a ni mek a, hetih lai tak hian vantlang tlawh leh en theih turin hawn a ni ta a ni tih floriculture department thuneituten an sawi.
Department hian tulip bulb-te hi thawh hran hrangin an ching a, thla khat aia tam pawh an vul theih phah thin.
Kuminah hian department chuan huanah hian tulip chi dang pahnih an ching thar nghe nghe.
Kumina a rawng chi dang chin belh nen hian he huanah hian tulip chi hrang hrang leh pangpar chi dang 74 a awm tling ta a ni.
Hyacinth, daffodil, muscari leh cyclamen telin thal laia par chi pangpar chi dang dang pawh huanah hian hmuh theih a ni bawk.
Huanah hian tulip bulb nuai 17 chuang chin a ni a, ram hectare 55 chuanga zauvah a inzar pharh thu thuneituten an sawi.
Huan hi a zau zawng tihbelh theih tawh lo va, tuna an chinna chin bak hi hmun awm tawh lovin pangparin a khat vek tawh tih an sawi bawk.
A tirah chuan Netherlands atanga lak luh tulip bulb 50,000 lak luh chingin bul tan a ni a. Khualzin bakah a hmuna awm ngeite pawhin an ngaihlu a, kum tin tlawhtu tam lamah leh tulip tam lamah a thang hret hret zel a ni.
Nikum thal lai khan India ram chhung hmun dang leh ram dang atangin tlawhtu nuai 4.65 chuang awmin favanga a vul pawhin nuai 3.65 chuangin an tlawh bawk.