Varane chawl ve ta…
Real Madrid leh Manchester United defender hlui Raphael Varane chuan kum 31 mi lek ni chungin football khela ei zawn a bansan thu a puang ve leh ta.
France international hlui Varane hian kumin July thla mai khan free transfer-in Italian club Como zawm mah se thla hmasaa Sampdoria laka a debut match-ah khan a khup a tina hlauh a, a tum aia hmaah inkhelh a bansan a ngai ta a, mahse, a club vawn laiah hian khelmual luh lam ni lo hna dang thawkin a inhamtang zui rih dawn tih a tarlang tel.
He centre-back hian French club Lens-ah a career \anin, first team tana season khat lek a khelh hnuah kum 2011 khan club lian Real Madrid a zawm ta mai a ni.
Spain ram khawpui bera kum 10 teh meuh hlawhtling taka a khelh chhung khan trophy 18 tehreng a lakpui zingah La Liga title pathum leh Champions League trophy pali tehreng a tling.
French mihang defender hi kum 2021 nipui thawt lai khan Old Trafford a pan a, a man sum hmahruaiah United-in pound maktaduai 34 an phawrh a; English club tan khan inelna hrang hrangah game 95 a khel tling.
Kum 2022-ah United chu Carabao Cup lakpuiin, Red Devils tana a inlan tawpna kha mi kum vek May thla Wembley khelmuala FA Cup final-ah khan an hmelma lian Manchester City a hnehpui leh