Vawi 3,000 dawn ‘Easter truce’ bawhchhiaah Russia puh

Vawi 3,000 dawn ‘Easter truce’ bawhchhiaah Russia puh
Ukrainian President Volodymyr Zelensky-a chuan Vladimir Putin-a’n Easter pualin inkahhai puang mah se Russia hian vawi 3,000 dawn an bawhchhia niin a sawi.
X-ah Zelensky-a chuan, “Russian sipaiten Russia-in inkahhai a puan hi nilengin vawi 2,935 an bawhchhia a. Pokrovsk lam hawiin laipui leh silai hmeh puah tam ber a ni a. Russia-in Kursk hawia engmah tihpuah loh a tih pawh zawm a ni chuang lo bawk a. A pum puiah ram hmatawngah Russian beihna 96, kan tanhmun laipuia kahna 1,882 leh Russian sipaite hman FPV drone thlawhtir 950 chuang a awm a ni,” a ti.
Ukraine pawhin an chhang let tih a sawi a, inkahhai chu inkahhai a nih anga kalpui mai tur a nih thu a sawi a. “Russian beihna hi kan invenna atan kan chhang let a. Thua sawi hi thiltihin a hliah zel a ni,” a ti.
Zelensky-a hian Easter atanga ni 30 chhung inkahhai a rawt bawk a. Ukraine hian hmun hla zawk kap thei drone leh missile hmanga ni 30 chhung mipui mamawh thil kah loh a rawt bawk a, hei hi pawh sei theih turin a rawt tel.
Hetih rual hian Ukrainian president hian Russia-in a pawmpui lo a nih chuan ‘mihring nunna lak leh indona kalpui zel a duh’ tih lantirna tur a nih thu a sawi bawk.
Putin-a chuan ‘Easter truce’ tia sawiin Inrinni atanga Pathianni thleng inkahhai a puang a, hei hi mihring dinhmun thlira tih a ni tih a sawi a. Zelensky-a pawhin Kyiv chu hemi tur hian a inrin nghal thu leh ni 30 chhung inkahhai a rawt tel nghal.
Kremlin thupuangtu, Dmitry Peskov-a erawh chuan Russian president hian inkahhai a puan chu pawh seina thupek a chhuah lo tih asawi ve thung.
Putin-a puan anga darkar 30 chhung inkahhai hi Inrinni zana Easter chawlh atanga hman tan kha a ni a; mahse, Russia leh Ukraine hian nasa takin an bawhchhia niin an inpuh tawn ve ve thung.
Zelensky-a chuan Russia hi ral hmatawngah chuan tha an thlah lo niin a sawi a, Moscow erawh chuan Kyiv beihna an lo chhang let mai nia sawiin drone leh laipui hmangin vawi tam tak an kap a, civil mi pawh an thi niin a puh let.
“Easter truce puan ni mah se Ukrainian unit-te chuan zanah Donetsk region-a Russian tanhmun beih an tum,” tiin Moscow-a defence ministry chuan a sawi a, an sipaite chuan ‘inkahhai hi tha takin an zawm’ niin a sawi.
Putin-a’n Easter truce a puan hi thla liam tawhah US president Donald Trump-a’n inkahhai puan a rawt hnua thleng a ni a. Hetih lai hian Zirtawpni khan Trump-a hian palai hna an thawhin awmzia a neih loh chuan inhnuhdawh mai a tum thu a sawi.
Russia hian Ukraine hi February, 2022 atang khan beiin an ram 20% vel a chhuhsak tawh a ni.