Vawiinah LADC VC inthlanpui

Vawiin – June 27 hian Lai Autonomous District Council (LADC) hnuaia village council inthlanpui buatsaih tura inthlan hma nia thlen phakna (P-1) VC 44-a inthlan buaipui tur polling party 57 leh Lawngtlai Chandmary bial MDC by election-a inthlan buaipui tur polling party 4 chuan Nilaini khan Lawngtlai DC office kawt atangin an duty-na tur hmun an pan.
LADC hnuaiah hian VC 99 awmin, Hmawngbuchhuah VC-ah chuan inthlan chuh tura endikna (scrutiny) paltlang zo an awm loh avangin inthlan buatsaih a ni dawn loa; Saikhawthlir VC-a seat 5 awmah chuhtu 5 (INC 1 leh ZPM 4) awmin, khingtu dang an awm loh avangin inthlan buatsaih ngai loa tlinga puan an ni dawn a ni.
Heti hian VC 97-ah inthlan buatsaih tur niin, voter tam zualna VC thenkhatah auxiliary polling station dah belh a nih avangin polling party 112 an awm a. Lawngtlai atanga hla zual, inthlan hma ni hniha pan ngai (P-1) VC 53-a inthlan buaipui tur polling party 55 chuan Thawhlehni khan an duty-na tur hmun an lo pan tawh a ni.
LADC VC inthlanpui leh Lawngtlai Chandmary bial MDC by election neih turah hian vawiin zing dar 7.00 atanga tlai dar 5.00 inkarah vote thlak a ni anga, VC inthlanah hian ballot paper hmanga vote thlak tur niin, MDC by election-ah hian electronic voting machine hman a ni ang. VC inthlana vote tla hi inthlan zawh rualin polling station hmun theuhah chhiar nghal a ni ang a; MDC by election-a vote tla chu kumin July 1 hian chhiar a ni ang.