Vawiinah MWBA tournament tan dawn
Vawiinah MWBA
tournament tan dawn
Mizoram Women’s Basketball Alliance (MWBA) leh a thlawptute tangkawp chuan vawiin August ni 15 (Zirtawpni), 2025 hian Mission Vengthlang Basketball Inpui-ah inelna an buatsaih dawn a; chawhnu dar 2 atanga tan turah hian team paruk an inlan ang.
Team tel turte –
1. JJJ (Captain – Saidingpuii Sailo)
2. MWBA (Captain – ST Lalchhanhimi)
3. Clutch (Captain – Chawnghmingliani
4. Dawhkan te (Captain – Christina Zodinsangi)
5. Vasto (Captain – Christina Lalhmingmawii)
6. CLS Academy (Captain – F. Lalramengi) te an ni.
Hoops Mania Time Out – Pheikhawk tivartu/chei thartu
Mi dang thatna tur leh an mamawh phuhruk tura luangchhuak thin te tluka hlu hi an tam bik awm lo mang e. Chung zingah chuan Aizawl District Basketball Association (ADBBA) puipa te zinga mi, hun khirhkhan karah pawh basketball than theihna tur leh infiamna huanga inhnamhnawih te tana a a ipte zen mai zel a, Mizo thalaite tana vawi tam lo insangchhuak tawh hi belchiang zuai ang u hmiang.
Zopa tumruh leh chhel, White Walker dintu Freddy K Zoremsanga hi kum 2021 khan MZU-ah BBA zirlai kum 21 mi lek a ni nang a, ngaihtuahna danglam leh dangdai zet neiin – pheikhawk hmelhmang duhthusam tawh lo te chu sawngbawlna behbawm nen a thar ang tluk thuaka chinfel leh chan tir dan a hmuchhuak a, sumdawnna kaw tha tak a hisap chhuak. He a hmalakna hian pheikhawk bazarah thil inthlakthleng a thlen tir a, a thar to tak lei ngai lovin man tlawm zawkin pheikhawk hlui a sawngbawl ta zel a, a chhawr tangkaitu chu Mizo thailai, a bikin infiammite an ni.
Freddy-a hi Zofate zingah chuan shoecare product brand puitling taka kalpui hmasa ber leh North East a lian ber a ni. Pheikhawk tih varna (shoe Whitener ) a kit angin khawvela a hmasa ber, product dang Cleaner Kit leh Deodorizer pawh North East-ah a siam chhuak hmasa ber bawk a, brand puitling tih theih awmchhun tur a ni hial.
Aizawl, Champhai leh Siaha-ah a pekchhuah bakah, AMAZON.in ah Mizo Shoe care brand zuar chhuak hmasa ber a ni cheu. Mizo thalaite tana luangchhuak ve zelin – Mizoram Super League (MSL) 7, 8 leh 10 te kha a lo sponsor ve tawh nghe nghe. MFN leh MFA futsal, Arm Wrestling Supermatch leh sport event hrang hrangah pawh sponsorship a lo ti ve tawh.
Freddy-a hi MZU-ah MBA 2023 batch ni in, nupui fanau neichungin top 10-a lang thei ngat a ni a, Phd chhunzawm tumin a insangphek mek.
Tun hnai mai July thla khan Tuikual North, Temple Road, Red Vanda chungah dawr hawng tharin, pheikhawk, bag, helmet chei, suk leh siam/chei thatna a hawng ve leh ta der.