Vawk 12,000 chuang chan tawh

Kuminah African Swine Fever (ASF) a na vak lo a, mahse Mizoram vawk chan zat a uiawm tham tawh khawp mai. Kum hmasate aiin hrileng a nasa lo chungin ASF vangin vawk 12,805 a thi tawh.
AH&Vety department chhinchhiah danin, ASF vangin kuminah vawk 9351 a thi tawh a, vawk 3454 tihhlum/suat (cull) a ni tawh bawk. ASF hi a tihdam theih loh avangin a darh zel tur ven nan he hri vei vawk hi tihhlum a ni thin a, chuvangin natna vanga thi bakah tihhlum hi a tam tham hle.
Mamit, Lawngtlai, Siaha, Lunglei, Khawzawl, Champhai, Hnahthial leh Aizawl district-ahte kuminah he hri hi a leng a, district pariata khua leh veng 162-ah finfiah a ni tawh.
Hrilenna hmun hi Lunglei district-ah a tam ber a, khua leh veng 39-ah a leng. Siaha district-ah khua leh veng 38-ah finfiah a ni tawh.
He hrileng hi chhungkaw 3683-in an tuar tawh tiin an chhinchhiah a, an tam berna chu Siaha district niin, he district-a ASF-in a nghawng hi chhungkaw 1295 an ni.
Khua leh veng tam berna Lunglei district-ah chhungkaw 714-in an tuar tawh a, an tlem berna Aizawl district-ah a tuartu chhungkaw zat chu 64 a ni. Aizawl district hi ASF finfiahna thar ber a ni a, a nasa vak rih lo.
AH&Vety department lam chuan hrileng hi kuminah kum hmasa aiin a zia an ti a, kuminah a vanglai a pel tanah an ngai. ASF finfiah hmasakna district-ah a zia tawh a, district thenkhatah phei chuan vawk thi report pawh a awm tawh lo.