Vbch. 41000 hu rel thuam thatna tur PM-in a hawng
India ram puma rel hmunhma leh a kawng tihhmasawnna tur project 2000 chuang, cheng vaibelchhe 41000 hmanga thawh tur chu Thawhtanni khan Prime minister Narendra Modi chuan a phum a. Mizoramah pawh Sairang Rel Station-ah inbiak hmuh theihna hmangin chhim a ni.Mizoram PWD minister Vanlalhlana chuan a hmanpui a. Km 51.38-a thui Bairabi- Sairang rel kawng (broad gauge line) siamna tur lungphum hi 2014 November 29 khan Prime minister Narendra Modi hian phumin, a hna tak tak hi 2015 December 15 atanga thawh tan a ni a. Hemi huamchhungah hian rel station pali – Sairang, Mualkhang, Hortoki leh Kawnpuiah siam mek a ni. Tun dinhmunah he ‘national project’ hi zaa 92 zawh tawh a ni a. Kumin October hian thawh zawh hman beisei a ni tih a sawi.
He project bakah hian km 223-a thui Sairang atanga Hmawngbuchhuah rel kawng sialna tur chu 2023 July 24 khan Ministry of Railways-in atan final location survey a sanction a, he project chungchang hi sawrkarin a ngaihtuah chhunzawm mek tih a sawi bawk.
“Rel luh hunah chuan in sakna bungrua leh bungraw dang dang pawh man tlawm zawkin kan chawlut thei tawh anga, khualzin veivak tan awlsam leh man tlawm zawkin a kal theih tawh ang. He hun hi hmang tangkai turin kan lo inpeih a, heng hna hi thawh ngei kan tum tur a ni a, hnamdang thawh atan kan dah a nih chuan ram leh hnamin a tuar a rinawm a, inbuatsaih that a ngai,” Vanlalhlana hian a ti.
India leh South East-Asia ram insumdawn tawnna kawng pawimawh tak pakhat a nih dawn avangin a lo dawngsawng turin Mizoram mipui inpeih a ngai hle tih pawh sawiin, “Hmathlir (vision) leh tih tur inchhawp (mission) nei loa kan lo nghah liam mai mai chuan hun tha kan hloh dawn a. He sumdawnna kawng thar inhawng tur hi hmang tangkai ngei tura kan inbuatsaih a hun,” a ti.
8 Lungphum phum tak project thar hi Amrit Bharat Station Scheme hnuaia kalpui a ni.
8 Rel station 553 bakah road over bridge leh underpass 1500 chuang siamna tur a ni.
8 He project hian states leh union territories 27 a huam dawn a ni.
8 Northeastern Frontier Railways hnuai bikah rel station 23, underpass 6 leh road overbridge 2 ruahman a ni.