VC inthlan sawn hma chhan…

Village Council/Local Council ding mek hian nakkum August thleng hun la nei mah se, Mizoram sawrkar chuan state sum daihzai taka enkawl leh hman a tul avangin inthlan hun a pawt hnai a, nakkum February thlaah inthlan huaihawt a ni dawn tih LAD minister chuan a sawi a. State sum hman daihzai a tul chhan chu, Finance Commission rawt anga Post Devolution Revenue Deficit (PDRD) Grant kum tin a tlakhniam tak vang niin minister hian a sawi bawk.
Sawrkar laipui hnuaia Ministry of Finance-in state 17 tana tanpuina sum a thehchhuah thin PDRD Grant hi Mizoram pawhin financial year 2023-24 chhung khan thla tin cheng vaibelchhe 122.83 (nuai 12,283) a dawng a. Kumin financial year (2024-25) hian cheng vaibelchhe 89.91 (nuai 8991) a dawng mek a. Nakkum financial year (2025-2026)-ah chuan thla tin cheng vaibelchhe 48.83 (nuai 4883) chauh a dawng tawh dawn a ni. A tlakhniam dan rate atanga chhut in, kum 2027 atang hi chuan PDRD Grant hi kan dawng thei tawh dawn lo tihna niawm tak a ni.
Hmachhuan tur thawhchhuah nei tha ve lem lo keini state ang tan chuan PDRD Grant hlutzia chu chhut chet chet pawh ngai lovin, chhut thuak pawhin a lang nghal zut zut zawk awm e.
Mizoram sawrkarin VC/LC inthlan hun a pawhtawi chhan hi, nakkum financial year chhunga PDRD Grant hmuh a tlem tawh dawn avangin, kumin financial year chhunga sum kan la hmuh tam theih deuh lai hi inthlan buatsaih nan an chuh ta zawk niin a lang a, thil tihawm tak pawh a ni awm e.
Hetih rual hian, VC/LC term rei zawng kum 5 atanga kum 3-a tlak thlak leh rawtna chungchangah, term rei zawng kum 3 a nih chuan kum thum dana inthlan huaihawt a ngai leh dawn tihna ang a ni a, inrenchemna lam hawi zawnga thlir chuan, term rei zawk chu a insensothlak lo zawk dawn tihna a ni ang.
Mahse, inthlanna sum senso ringawt ngaihtuah theih a nih lohna lai a awm ve thung a, tuna kan dinhmun mekah hi chuan, term khat kum 5 tih hi kan zo lo deuh niin a ngaih theih a. Hemi chungchang hi, mipui aw social media hrang hranga ngaihdan hrang hrang han thlir hian, kum 5 hi chu,tawng mawi lo ni lo se, kan ‘chhang-kham’ deuh em ni aw a tih theih. Hei hian local government inrelbawlna boruak a hnuk hniam thei a, chu chuan a nihna tur anga hmasawnna thleng tur a dal ve thei bawk.