Venezuela inthlanah Maduro chak lo ti

US secretary of state chuan chiang takin Venezuela president thlannaah Opposition ten chakna an chang zawk tih fiahna a awm tiin a sawi.
Thuchhuah a siamah Antony Blinken chuan, president Nicolas Maduro-an chakna a chang a inti chungin, Edmundo Gonzalez-an vote tam ber a hmu a ni, a ti. “Finfiahna chiang tak a awm a, United States mai bakah a pawimawh ber Venezuelan mipuite tan Edmundo Gonzalez Urutti chuan 28 July presidential election neihah khan vote a hmu hnem ber a ni,” tiin Blinken chuan a sawi.
Hetih lai hian Brazil, Mexico leh Colombia te chuan Venezuela chu Pathianni kaltaa inthlan result kimchang tarlang turin an ti bawk.
Pathianni kalta khan Venezuela electoral council sorkar thunun vek chuan President Maduro chuan a term thum nan chakna a chan thu a puang a ni.
Chu chu opposition ten hnialkalh nghalin dawt a ni an ti ve thung a, opposition te chuan an vote tally atang chuan hneh takin hnehna an chang an ti ve thung.
President Maduro chuan a hma pawhin Venezuela inthlanah foreign sorkar te inrawlhah a lo puh tawh thin a.
Kumin inthlanah engmah tihdik loh a awm lo tia sawiin opposition te chuan an result duh ang an hmuh loh avangin harsatna siam an tum a ni, a ti.
President Maduro-an chakna a puan avangin Caracas khawpuiah chuan lungawilohna nasa taka lantir zui a ni a. Khawvel ram hrang hrangte pawhin Venezuela sorkar chu inthlan result proof pe chhuak turin an ngen bawk.
Venezuela inthlan result chu China, Russia leh Iran ten pawmpui thungin heng ram te hi Venezuela thian tha te an ni thung a.
Mahse, US, European Union leh G7 ram te chaun President Maduro sorkar chu voting data kimchang tichhuak turin an ngiat thung a.
Blinken chuan, “Electoral data chuan chiang takin Venezuela mipuite duh dan pholangin, opposition candidate Edmundo Gonzalez chuan Pathianni a inthlanah chakna hneh takin a chang a ni” tia sawiin, “Venezuelans ten an vote duh an pholang tawh a, an vote chu a dingchang tur a ni,” a ti bawk.
Blinken thusawi leh inrawlhna hian awmzia thuk tak a nei a. Kum 2018 inthlan pawh kha a free lova a fair lo tih ni tawh bawkin US leh ram dang-te chuan khatihlaia opposition leader Juan Guaido chu interim president chu pawm zawkin Venezuela an hrek zui bawk a ni.
Blinken chuan Venezuelan party te chuan Venezuelan electoral law leh Venezuelan mipuite duh danin sorkar an kalpui a hun a ti bawk.
Opposition leader Maria Corina Machado, biru mek chuan Inrinni ah lungawilohna liantham tak kalpui ni se a ti a. Machado chuan Maduro chuan inthlanah chakna a chang lo a ti bawk a.
An party candidate Gonzalez chuan hneh takin chakna a chang tia sawiin a finfiahna turin polling station 80% atangin receipts a nei tiin a sawi bawk.
Machado chuan tunah chuan international community te kutah thil a awm tawh tiin Venezuela sorkar chu an pawm dawn em tih an tihchian a ngai a ti bawk.
Venezuela-ah hian Nicolas Maduro an Hugo Chavez thih hnu atangin sorkar-na a la chang char char a. Venezuela inthlanah term thum nan tun hnai inthlanah chakna a chang leh intiin mahse inthlan chu dikhlel taka kalpui a ni tiin Opposition te chuan an sawi thung a. Khawvel ram tlemte chauhin an pawmpui a ni.