Venezuela la buai

Opposition supporter te chu Venezuela ah Nicolas Maduro-an thla kaltaa presidential election inthlana chakna a puan duh lovin an pungkhawm.
Opposition leader Maria Corina Machado chuan Caracas khawpuia pungkhawm tam tak te chu zawmin hlau lo turin a fuih a.
Helna chawkchhuahtu tia puh a nih hnua bibo zui reng Machado chuan mipuite aw aia chungnung engmah a awm lo tia sawiin mipui ten an duhdan an sawi tawh a ti bawk.
Hetih lai hian Maduro thlawptute pawhin punkhawmna nei ve thovin police leh army te chuan thil duhawm lo thleng thei ven nan an thawk rip hle bawk a.
“Kawtthler hi kan rauhsan dawn lo” tia sawiin Machado chuan mipui tam tak te chuan voting station atanga election record copy te chu lek kangin chu chu hnehna an chan zia pholannaah an ngai a. Lungawilohna lantirtu thenkhatte chuan kalpui chhunzawm zel an tum thu sawiin, “Criminal sorkar hian thuneihna chelh zui zel an duh a ni. Zalenna rim ka hria a, hlauh ka nei lo” tiin Adrina Calzadilla chuan a sawi a.
“Maduro hian a chak lo tih hi pawm se ka duh a, thuneihna hlanchhawng mai rawh se” tiin medical student Jose Berbin chuan a sawi bawk.
“Dictatorship a insawhmuk zual zel dawn tih a chiang a, chuvangin dictatorship duh lova kan lungrual a ngai a, mi tha tam tak an la awm tih kan lantir a ngai a ni,” tiin a sawi bawk.
Maduro chuan inthlanah a zawna term thum nan kum ruk atan thlan tlin leh a ni a inti a, mahse, opposition tena vote tally an tihchhuahah chuan an candidate Edmundo Gonzalez chuan hnehna chiang takin a chang thung.
Gonzalez pawhin a tawmbona atangin’thuneihna inhlanchhawn a hun’ tia sawiin Maduro thung chuan Gonzalez chu ‘puka cheng mek’ tiin a sawi ve thung.
Electoral commission, Maduro allies tena an thunun chuan inthlan result a tihchhuahah Maduro chuan vote 52% hmu in chakna a chang a ti a, mahse, independent observer te chuan vote result chu langtlang lo an ti thung.
Inthlan zawh hnu atangin anti-government protest a nasa hle a, mi za tel security forces ten an man tawh bawk. Venezuela sorkar chuan 29 July atangin mi 2,400 chuang an man tawh tiin an sawi.
UN chuan kawtthlera lungawilohna lantir leh social media-a sorkar sawiselna te chu Venezuela sorkarin na takin a chhang let zel tiin a sawi bawk.
Venezuela mai bakah lungawilohna hi khawvel hmun hrang hrang Australia atanga Spain mai bakah United Kingdom, Canada, Colombia, Mexico leh Argentina ah te pawh lantir a ni. European Union, United States leh Latin American ram tam tak te chuan Venezuela inthlan result chu an pawmpui lo bawk.