Venezuela opposition leader-in democracy tundin nan beih zel tum

Venezuelan opposition candidate Edmundo González chuan Spain in asylum a pek hnuah Venezuela a democracy tun din a nih theih nan theihtawp chhuaha a beih zui zel tur thu a sawi.
Gonzalez chuan Venezuela chu Spain military airplane hmanga chhuahsanin a nupui nen Madrid an thlawklut a.
Kum 75-a upa Gonzalez chu opposition candidate niin July 28 a Venezuela inthlanna neihah chak zawk tiin an sawi a, mahse, President Nicolas Maduro chu election commission chuan chak zawkah puangin chu chu khawvel ram tam takin an pawmpui loh a ni thung.
Audio message a tihchhuahah Gonzalez chuan hun rei lo te hnuah zalenna neiin Venezuela ah democracy tundin leh ngei a nih theih nan theihtawp chhuahin kan beizui ang tiin a sawi.
Venezuela a chhuahsan hmain sorkar chuan amah manna thupek tichhuakin phatsanna phiarrutu leh document dik lo siam tiin an puh thung.
Spain a thlen hnuah Gonzalez chuan, “Caracas ka chhuahsan hmain nasa taka nawr, tihluih leh ram chhung chhuahsan thei lo tura vau in ka awm a ni,” tiin a sawi.
A hma lawk pawhin Venezuela Opposition leader Maria Corina Machado chuan social media kaltlangin Gonzalez chu a nun derthawnga a awm avang leh inthlan zawh tawh hnuah nasa taka rawng taka rahbeh tumna avangin loh theih lohin ram a chhuahsan a ngai tiin a lo awi tawh bawk.
Machado chu Venezuela a politician lar ber niin Maduro khing ber tura ngaih a nih laiin inthlan dawn ruaiah Venezuela sorkar chuan Machado chu inthlana chuh thei lovin an siam zui a, chuvang chuan opposition te chuan Gonzalez chu an vawrhchhuak ta a ni.
Inthlanna neihah pawh opposition te chuan Gonzalez chuan hnehna a chang tia sawiin voting tally kimchang te pawh internet ah an thehdarh a, Gonzalez chuan Maduro lakah chakna hneh takin a chang an ti.
US, EU leh foreign government thahnem tak te chuan inthlanah Maduro chakna chu pawmpui duh lovin Caracas chu voting data kimchang pechhuak turin an ngen a, tun thlengin Caracas chuan inthlan data kimchang a la pechhuak duh lo thung.
US Secretary of State Antony Blinken chuan Venezuela chhuahsana Gonzalez an Spain a panna chu ‘Nicolas Maduro kaihhruaia Venezuela mipuite laka anti-democratic measure kalpui hrin a ni’ tiin a sawi.
“Inthlan result leh mipuite duhthlanna chu Maduro leh Venezuela electoral authority tena an duh ang anga an her danglam theih ngawt a ni lo. Gonzalez kan thlawp tlat a, Venezuela ah democracy leh zalenna tundin a nih ngei theih nan theihtawp chhuahin hma kan la zel ang” tiin Blinken chuan a sawi bawk.
European Commission Vice-President Josep Borrel pawhin, “Vawiin hi Venezuela democracy tana ni duhawm lo a ni” tia sawiin, “Democracy ramah political leader tena ram danga asylum dil lo thei lova siam a ni tur a ni lo” tiin a sawi bawk.
Spanish Prime Minister Pedro Sanchez pawhin Gonzalez chu ‘Spain-in a thlauhthlak ngai loh tur hero a ni’ tiin a sawi bawk.
Gonzalez hian Spain sorkar a ngenna angin Spain military plane hmangin Madrid-ah phurh thlen a ni a. Venezuela a chhuahsan hma hian Maduro kaihhruai sorkar chuan manna thupek tichhuakin man ngei tumin an bei nasa hle a, mahse, a bikbo tlat avangin a awmna an hre mai thei lo a ni.