Venezuela Opposition Spain-ah

Venezuela sorkar chuan opposition presidential candidate Edmundo Gonzalez chuan asylum dilin Spain a pan thu sawiin Venezuela a chhuahsan tiin a sawi a.
Gonzalez hi kumin July thlaa presidential election result opposition tena an pawm loh hnuah man hlauin a biru char char a ni. July thla inthlanah khan National Electoral Cpuncil (CNE) chuan Nicholas Maduro chu chakah a puang a ni.
Venezuala Vice-President Delcy Rodriguez chuan social media-a post a siamah Spanish embassy Caracas a inhumhimna a dil hnuah Gonzalez chuan Spanish sorkar hnenah poltical asylum a dil zui tiin a sawi.
Spain Minister of Foreign Affairs Jose Manuel Albares chuan Gonzalez chuan ama duhthu ngeiin Spanish Air Force plane hmangin Venezuela a chhuahsan tiin a sawi bawk a. Spanish sorkar chuan Venezuelans te political rights chu chawinun zel a tum a ti bawk.
Gonzalez lawyer pawhin AFP news hnenah Venezuela a chhuahsan thu sawiin mahse kimchangin engmah a sawi lo thung.
Gonzalez-an Caracas a chhuahsan hnuah Venezuela security forces te chuan Argentine embassy chu an hual nghal bawk a, Argentine embassy-ah hian President Maduro political opponent paruk an awm meka ngaih a nih vang a ni.
Venezuela hi 28 July-a inthlan result puana Maduro tlinga puan a nih hnuah buainain a chim zui ta char char a. Opposition-te chuan inthlanah chiang takin Gonzalez chuan chakna a chang tia sawiin voting tally te chu internet-ah pholangin chutah chuan Gonzalez chuan chiang takin Maduro a hneh a ni.
Ram thahnem tak United States, European Union leh Latin America ram tam tak te chuan inthlanah President Maduro a chak tih chu an pawmpui lo bawk a, Caracas chu voting data kimchang tichhuak turin an ngiat bawk.
Inthlanna neih atangin President Maduro chuan a political opponent 2,400 chuang man tawhin lung inah a khung mek hlawm a, UN pawhin Venezuela-ah ‘hlauhna intuhna’ a awm mek tiin a sawi.
July 30 atang khan Gonzalez chu mipui hriatah a inlan tawh lo va, thuneitu tena an man hlauhna vang a ni.
Kum 75-a upa ni tawhin kumin March thlaa opposition tangrual tena candidate intawm atana an puan hma kha chuan tu khaw kha hriat lar a ni lem lo.
Presidential candidate atan a duh ber zawk chu Maria Corina Machado a ni a, mahse, Maduro sorkarin chhuanlam chhete te hmanga inthlan hmachhawn thei lo tura an siam avangin Gonzalez chu ruat a nih phah a ni.