Venezuela opposition ten lungawilohna lantir dawn

Venezuela opposition coalition te chuan an ram president thlannaah chakna an chan zawkzia pholanna turin 17 August ah khawvel huapa lungawilohna lantirna neih an tum.
President Nocolas Maduro chu sorkar thunun tlat electoral commission chuan chak zawkah a puang tawh thung a, a term thum nan office a luah leh dawn a ni.
Opposition te thung chuan an candidate Edmundo Gonzalez chu chak zawk dik tak ti ve thungin election commission chu polling station tin atanga data kimchang tichhuak turin an ngiat ve thung.
Venezuela Opposition te thutlukna siam chu European Union leh US te chuan an thlawp thu sawi ve ve tawhin Latin America ram te pawhin thla kaltaa Venezuela inthlana Maduro chaka puanna chu an pawm thu an la sawi hlawm lo bawk.
Opposition leader Maria Corina Machado chuan social media a video a phochhuahah Venezuelans te chuan Inrinni 17 August ah an party chakna an thlawp zia pho lannan ‘kawtthlerah’ an lantir tur a ni a ti a.
“Kan chakna an thlawpna leh thudik leh popular sovereignty pawm a nihna lantir nan khawvelin min thlawp theih nan kan che chhuak tur a ni,” tiin a sawi.
July 28-a election zawh fel hnu lawkah opposition te chuan online-ah data tichhuakin chutah chuan Gonzalez chuan hneh takin chakna a chang zawk an ti a.
US Secretary of State Antony Blinken pawhin ‘finfiahna chiang tak’ a awm thu sawiin Edmundo Gonzalez chuan vote tam ber a hmu a ni, a lo titawh bawk.
Maduro sorkar thung chuan National Electoral Council (CNE) te thutlukna chu thlawp tlat thungin a dik vek an ti ve thung a.
Maduro chuan vote tally a tihchhuah tur thu sawiin mahse a hun a sawi lang lo va. Opposition te chu election result kaihhnawihah fake video tichhuaka puhin chung thilah chuan US chu inhnamhnawih vekin sorkar paihthlak theih nana hmalakna a ni, a ti bawk.
President chuh thei lova siam Machado thlaktu Gonzalez chuan ‘thudik’ a dinchan theih nan tiin ram chhung leh khawvel huapa lungawilohna chu thlawp turin ngenna a siam bawk.
Gonzalez leh Machado te hi an biru mek ve ve a. Machado chuan Wall Street Journal-a article a ziahah a nunna leh zalenna chhuhsak hlaua a awm mek thu a sawi bawk a. Venezuela sorkar chuan Machado chu man tuma a hel mek a ni thung.
Official poll result tihchhuah a nih hnuah Venezuela leh Latin America ram hrang hrangah te chuan official poll result duhlohna lantirna neih a ni hlawm a.
Venezuela sorkar chuan mi 2,000 chuang man an nih thu sawiin chung mite chu ‘terrorism’ thubuai a siamsak thu an sawi a. Opposition hruaitu lawk thenkhatte pawh kar kalta khan an man bawk.
Opposition coalition Vente Venezuela campaign co-ordinator Maria Oropeza chuan amah man an tum lai Instagram-ah a live a. Amah thlawptute chu man a nih theihna turin engmah tihsual a neihloh thu a hrilh lai mekin bengchheng nasa tak tak hriat a ni bawk a. Chutah Venezuela military counter-intelligence agency te chuan a kawngkhar tichhiain an luhchilh a, a video pawh a tawp zui ta a ni.
Opposition party Popular Will tana thawk Freddy Superlano leh Roland Carreno te pawh manin an awm a, an ni bakah hian opposition movement technical adviser Ricardo Estevez pawh man a ni bawk.
Venezuela opposition tangrualte chuan President Nicolas Maduro chu pawm an tum loh thu sawiin a tawp thlenga dodalna an kalpui tur thu an sawi bawk a. Chutih laiin sorkar chuan opposition te a vai nasa hle thung.