Veng chin inchuhna boruakah chechhuak

Dawrpui Veng leh Chhinga Veng chin inchuhna boruakah veng pahnih aiawh an chechhuak a. Thil tar inlakthlak sak kaihhnawihah Police Station-ah FIR thehluh a ni.
Chhinga Veng Thalai Pawl hminga thuchhuah siam danin, tunhma in ramri buai an neih an hre ngai loa, Electric Veng Sakawrpului atanga Bazar panna atanga ABC Lane chu pipu atanga Chhinga Veng chhung a ni a, kum 2020- 2021 Covid len lai khan helai area-ah hian Dawrpui lamin dawr khar tura hriattirna lehkha an rawn sem a, Chhinga Vengin an vengchhung a nih avangin dawr hawng turin an hrilh ve thung tih a sawi.
2025 kum tawp lam khan Chhinga Veng Local Council leh NGOs chuan Chhinga Veng chhunga dan phalloha sumdawngte titawp turin hma an la a, hnamdang sumdawng tam tak tihtawp tir niin, kumin March khan Dawrpui Local Council chuan ABC Lane-a awmte chu Dawrpui Veng hming lanna signboard tar turin a hriattir tih a sawi a ni.
Kumin YMA Day, June 15 zing khan Dawrpui Veng hnatlang chuan Chhinga Veng chhungah hna an rawn thawk a, tawngkamin Chhinga Veng KTP leh YMA building chu Dawrpui Venga awm an tih an rawn sawi thu a sawi/
He thil hi hrethiam loin Chhinga Veng thalaite an che chhuak ta nia sawiin, June 16 zingkara Chhinga Veng Thalai hnatlang thenkhatin kan vengchhunga Armed Veng Kohhran Thalai hoarding tar an lo la thla palh a, a pawi kan ti takzet a, an ngaihdamna kan dil a, hoarding hi thalaiten an tar tha leh vek tawh a ni,’ a ti.
Chhinga Veng chu Aizawla veng hlun tak zing ami, kum 1912-ah Pi Phiri m/o Rev. R Lalengkima te pawh awm tawhna, 1932-ah phei chuan in 25 a ding tawh tih sawiin, ‘Dawrpui Veng atanga indang niloin, kohhran erawh chu Dawrpui Kohhran atanga indang a ni. Kan veng humhim tur hian Chhinga Veng Thlai Pawl chuan hma kan la zel dawn,’ thuchhuah chuan a ti.
Hetihlai hian Dawrpui Veng Local Council, YMA, MHIP leh MUP telna – Dawrpui Joint Committee chuan an veng ramri chungchanga Chhinga Veng Thalai chet danah lungawi loin, Thawhlehni khan Aizawl Police Station-ah FIR an thehlut.
Chhinga Veng Thalai Pawl intite chuan June 16 zing khan Dawrpui Veng chhungah inhawr khawmin, sawrkar gazette (The Mizoram Gazette Vol. XXIII Aizawl 29.4.1994, Issue No. 59) zah lo takin Dawrpui Veng chhunga dawr anmahni tala-a kalh sakin, poster an tar nghal zel tih an sawi a. Chhinga Veng Thalai hian placard keng chung leh aurinna hmanga kawng zawhin signboard thenkhat an ti chhia a. Tharum thawh duh mai na rilru pu leh tawngkam na takin Dawrpui tuallaiah Dawrpui khawtlang mipui cho taka an che chu Dawrpui khawtlang chuan na an tiin hriatthiam har an ti hle tih an sawi.
Hei bakah hian Dawrpui Thlanmual (Land Lease No: DLL-62 of 1990) signboard lian leh thil tar zawng zawng diriam taka la thlain an tichhia tih an sawi a. He an hmalakna pawh hi Dawrpui bakah Dawrpui Thlanmual Committee: Dawrpui, Saron Veng, Armed Veng, Armed Veng South, Tuithiang leh Chhinga Veng intawm thlanmual a ni a, Dawrpui chu pass holder an ni tih an sawi.
Hetianga thlanmual zah zo loa an che chu pawi an ti hle tih sawiin, dawr an kharte hi a hma thei ang bera hma laksak a, thlanmual signboard an lak thlak pawh a hma thei ang bera dah let leh tura hma laksak turin police an ngen tih FIR-ah hian an ziak a. Hetianga an vengchhunga Chhinga Veng thalai intite chet dan pawh evidence tha tawk tak an nei tih sawiin, an veng ramri chungchanga an buaina chu a serious hle a, ramri hrechiangtu ngei case incharge officer atan pe tur leh an FIR thehluh chu pawmsak a, a rang thei ang bera hma laksak turin an ngen tih an sawi a ni.
He thil thlengah hian Thawhlehni vek khan AMC Ward No. IX corporator B Lalawmpuii hoin veng pahnih local council an thukhawm a. Dawrpui leh Chhinga Veng inkara thil thleng chu pawi an tih thu sawiin, local council pahnih an inbiak hnu ah, veng pahnih mipuite inbeng dai a, local council thu ngaichang turin an inhriattir tih an sawi. A tul angin DC leh AMC lamah pawh hma lak zel tum a ni tih an sawi a ni.
‘Hemi chingfel tur hian Dawrpui leh Chhinga Veng Local Council chuan a tul angin hma kan la ho zel dawn,’ an ti.