‘Veng feeling’… ‘thawhpui theih’

Aizawl Municipal Corporation inthlan a hnai tual tual a, party campaign thawm pawh a ring tual tual. Tun hnai khan ZPM leader Pu Lalduhoma, chief minister chuan, ‘veng feeling’ neih chu a sual lo a, veng hmasawnna thlen theitu ni lo ai chuan veng tana hmasawnna thlen theitu zawk candidate vote mai chu veng feeling neih dan dik a ni, tiin a sawi a; state sawrkar do ngar ngartute candidate vote aiin state sawrkar thawhpui theih ZPM candidate vote chu veng tinin an sawtpui a rin thu a sawi bawk.
Mizote hian, chhiatna lam a ni emaw, thatna lam a ni emaw, veng feeling kan nei sâng thin hle a. A tul kan tih chuan mi kan hnawt chhuak mai a, tha kan tih chuan mi kan chawimawi leh mai a; chu chu veng feeling chu a ni ber awm e. Hetih lai hian, politics thilah erawh veng feeling hi a lang vak tawh lo. MLA election-ah veng feeling a lang vak lo a, chutih laiin a aia hnuai deuh, municipality te, local council te, village council-ah te erawh, a party lam aimahin a mimal ‘personality’ tih vel kan en thei ve deuh.
Election campaign au hlaah hian, tunhma atangin a ni tawh, ‘ruling’ leh ‘ruling lo’ tih te, ‘hmasawnna thlen theitu’ tih te, ‘thawhpui theih’ tih te hi vauchherah kan nei chawk a, hetia han ngaih mai chuan dik hmel tak leh tha viau awm takin a lang a. Mahse, han chhut chian chuan, ruling candidate an tlin lohvin, kha veng/ward/constituency khan hmasawnna a hmu lo ang a, sawrkarin a thawhpui ve dawn lo, tihna lam a kawk thei daih mai a; chu chu ‘hleih nei taka rorelna’ emaw ‘inthliar hranna’ emaw lam a lo ni leh a; chu chuan Mizoram leh a chhunga cheng mipuite hmasawnna tur a tithuanawp dawn tihna a ni.
Heti zawnga campaign lo hian, ‘kan tlin chuan veng hmasawnna turin chumi khami chu kan ti dawn/kan thawk dawn’ etc. tih hi inzawrhnan political party tin hian hmang mai se. Ruling a ni emaw, opposition a ni emaw, ward fund inzat theuh nei an ni a, fund hmang tha, hmang dik leh hmang thiam chuan hmasawnna a thlen dawn a, chutiang ti thei tur mihring chu a ni em tih kha mipuiin an buk tur chu ni mai awm tak a ni. Chuti ni lova, opposition lam ‘hmasawnna thlen theitu ni lo’ tur anga indah tlat mai hi hmasawnna daltu a ni nghal a, ‘hleih-neihna’ ‘inhrek-behna’ a ni dawn a, hei hi thil tha lo tak niin a lang.