Verstappen chungchangah F1 milian pahnih inchhang lawk!
Pathianni Chinese Grand Prix 2024-a hnehna rawn changkirleh ta Red Bull driver chhuanvawr Max Verstappen chungchangah tunhnai khan Mercedes-AMG Petronas F1 Team Principal leh CEO ni bawk Toto Wolff chuan tawngkam chehin, Dutch driver chu British team-in lei tuma an sawiho tawh thu leh season thara chhawr theih dan kawng an dap tur thu a sawichhuak a, hei hi Red Bull team principal Christian Horner chuan na taka sawiselin, team talbuai Mercedes-a an driver kal duh turah an ngai reng reng em ni tiin zawhna a zawtlet khauh!
Motorsport executive, investor leh racing driver hlui ni bawk Torger Christian “Toto” Wolff hian a hma deuh pawhin Mercedes-a Max Verstappen lakluh an tum chungchang hi a lo sawiri tawh a, Pathianni Chinese Grand Prix intlansiak behbawmah sawichhuak lehin, an driver beisei mek chungchang chu mi zawng zawngin an ngaichang thup niin a sawi.
Austrian billionaire Wolff chuan tunah an dinhmun la fuh chiah lo mah se kum 2026 atanga hman tan tur chassis leh engine kalpui hunah chuan an dinhmuna kang dawrh tawh dawn niawmin a sawi a, Verstappen leh a management team lamin thutlukna an siam tur thu a tarlang tel.
Verstappen-a management team-ah hian a pa, F1 driver hlui ve bawk Jos Verstappen leh a manager Raymond Vermeulen an tel.
British motorsport executive leh racing driver hlui ve bawk Christian Edward Johnston Horner a ter at a, kum 2028 tawp thleng Red Bull-a contract la nei Verstappen chu midang tana beisei chi a la nih loh thu sawi chungin, Engvang tehlulin nge he team hi a chhuahsan duh ang? Kan driver beiseitu Mercedes ber kher lah chu an customer pahnih McLaren leh Aston Martin inkarah an su tawk leih leih chauh a ni a; Wolff hian driver market lam buaipui loin an team lamah a rilru sawrbing zawk se a tifuh ang.
“Ka tiam duh che u chu season thara Max Verstappen-a awmna tur hi inzawh buai a ngai lo tih a ni.
“Max hianmidang zawng aiin motor racing chungchang hi a hre bel zawk a, a tana tha tur ngeiin thutlukna a siam khawp ang,” a ti.
Shanghai khaw tlankawngah pawh khan British team Mercedes talbuai lehin, an driver chetha zawk George Russell chu paruknaah a thleng a, champion ropui Lewis Hamilton pawh pakuana ni pha chauhin, Briton mihang driver hian Mercedes car chak loh a tuar kal mek a ni.
Karliamta Ningani daih tawh khan Shanghai khawpuia inbuatsaihna an kalpui laiin Verstappen chu a hmalam hun awm dan tur an zawt a, Dutch driver chuan:
“He team-ah hian hun rei tak daih tur contract ka ziak a, Red Bull ka luhchilh phat atanga ka lo sawi tawh chu he hmunah hian boruak muanawm leh hahdam tak hip ila tih hi a ni. He team-ah hian ka hlim a, ka chhuahsanna tur chhan a awm lo.”
Chinese Grand Prix
Shanghai International Circuit-a Pathianni intlansiak chungchangin han chhunzawm hlek ila.
Season kal laia F1 race vawinganaah khan nuamsa taka Max Verstappen a chak laiin Red Bull one-two erawh kan hmu zo ta lo a, a Mexican team-mate Sergio Perez chu pathumnaah thlengin, an inkarah rin loh takin McLaren driver Lando Norris a rawn tlazep teh tlat a, Red Bull one-two kan hmuh loh phah!
Lawmman semna dawhsan chung ber la luah ve chiah lo mah se Sergio Perez khan intlansiak vawinga zawh tawhah point keng tam dinhmun a chan chhoh ve zel avangin vawili chak tling tawh championship hmahruaitu nena an ibnthlauhna pawh point 25 aia hniamah a dah duh leh rih ta lo!
Pathianni result kha triple world champion Max Verstappen tan kum nga chhunga Chinese Grand Prix hnehna a chan vawikhatna a nih rualin a career-a F1 pole vawi 100 a luahna a ni a; tlankawng hrang hrang 26-ah hnehna chang tlingin, a career-a F1 race vawi 58 a chak tlinna chiah a ni nghal bawk.
Kum 2019 hnu lama Shanghai circuit-a grand prix an nghah leh vawikhatnaah Inrinni sprint race-ah khan Red Bull driver thleng hmasaber bawkin, season kal laia sprint hnehna a chan vawikhatna a ni tel.
Ferrari driver Charles Leclerc chu podium lawn pha lo chiahin palinaah a thleng a; a team-mate Carlos Sainz pangana niin, Mercedes khalhtu George Russell parukna a ni a, pasarihna luahtu Aston Martin driver Fernando Alonso chuan fastest lap hmangin bonus point khat a rut tel.
Constructors’ standing lamah Red Bull an sang fel leh tawh hle a, anmahni hnaihbertu Ferrari nen point 44 zetin an inthlau tawh.
Verstappen chungchangah F1 milian pahnih inchhang lawk!
Get real time updates directly on you device, subscribe now.
Prev Post
Next Post