Vety ram humhalh that tum

AH & Vety department ram humhalh that a, tangkai zawka hman dan zawn an tum tih vety officer-te chuan an sawi.
Mizoram Veterinary Service Association (MVSA) chuan Zirtawpni khan Annual General Conference vawi 40-na an hmang a. Hmanpuitu AH & Vety director Dr C Lalrintluanga chuan central scheme zirchiang a, a hlawk thei ang bera hmang tangkai turin officer-te a chah a. Mobile Veterinary Unit (MVU) leh Call Center 1962 chu hman tangkai lehzual a nih theih nan mipuia puangzar uar turin a chah. Tunhnaia African Swine Fever leng thar leh chu department-in tih ziaawm tumin hma a la zel tih a sawi bawk.
Conference-ah hian kum 2024- 2026 chhunga MVSA hruaitu tur thlan a ni a. An thurel zingah, department-in ram a neihte chu nasa zawka humhalh a, hman tangkai dan zawn nise, an ti.
Kum 2023- 2024 chhung khan an member mi 7 pension-in an chhuak a. Kumin March 9 khan CM Relief Fund ah Rs 100000 an hlan. Surgery subject-a national award dawngtu Dr John B Khithie chu MVSA hminga chawimawina hlan a ni.