Victory Day lawmnaah Rajnath Singh-a’n India aiawh dawn

Victory Day lawmnaah Rajnath Singh-a’n India aiawh dawn
Defence Minister Rajnath Singh-a chu Russia-in thla thara Victory Day parade a huaihawt turah India aiawha a tel rin a ni.
Tun tum Victory Day hi a kum 80-na tur niin Indopui II-naa Germany leka hnehna chan ni lawmna a ni.
May 9-a Moscow-a hun hman turah hian Prime Minister Narendra Modi chu sawm a ni a; mahse, ani hi Russia-ah hian a kal hmel loh va, India ai hi Singh-a hian a awh hmel niin sorkar mi pawimawhten an sawi.
A hmain Russia-a sorkar enkawl Tass news agency chuan Deputy Foreign Minister Andrey Rudenko-a’n Moscow-in Modi-a hi Germany hnehna champha kum 80-na lawmnaa sawm a ni tih a sawi chu a tar lang tawh a. “Indawr mek a ni a, Modi-a hi sawm a ni,” tiin Rudenko-a hian Thawhlehni khan a sawi.
Russia hian Victory Day parade-a tel tur hian a thian tha ram hruaitute a sawm hlawm.
Modi-a hi nikum khan Russia-ah vawi hnih zinin President Vladimir Putin-a nen kum tina an inbiak thinah a tlawh a, Kazan-a Brics Summit hmangin a kal leh bawk a. “Russian president hi kumina inbiaknaah chuan India-a a lo kal beisei a ni ve thung,” tiin sorkar mi pawimawh chuan a sawi.
External affairs ministry thupuangtu, Randhir Jaiswal-a pawh May 9 parade-a India aiawh tel chungchang zawhna chhangin, “Kan prime minister chuan Victory Day lawmnaa tel tura sawmna a dawng a. Victory Day lawmnaah hian kan tel dawn tih chu a hunah kan la puang ang,” a ti.
Prime minister hlui, Manmohan Singh-a pawh kha kum 2005 khan Russian Victory Day parade-ah hian lo tel tawhin hemi tum hi kum 1945-a Nazi Germany hneh a nih kum 60-na a ni.