Zionparlawma
State Nodal Officer
-- Advertisement --
A intan dan : Vidyanjali hi kum 2006 khan pawl 8 leh a hnuai lam tan State leh UT thenkhatah kalpui a lo ni tawh a, September 2021 khan tuna kan Prime Minister Shri Narendra Modi hian a hawng leh a, a hmingah hian Vidyanjali ti ngawt tawh lovin Vidyanjali 2.0 tih a ni ta a, pawl 12 leh a hnuai lam tan ruahman a ni, State leh UT zawng zawngah kalpui a ni ta bawk a, Mizoramah hian December 2021 atangin kalpui tan a ni a, a enkawl hna thawk turin Samagra Shiksha, Mizoram ruat an ni.
A awmzia : Vidyanjali tih hi Sanskrit tawng Vidya ‘hriatna dik’ tih leh Anjali ‘kut pahnih hmanga thil pek’ tih atanga lo kal a ni. Thil hi kan hriatna a dik leh dik loh hian kan thil hmuh dan leh ngaihdanah danglamna nasa tak a thlen thei a, kan thiltihah pawh nghawng nasa tak a nei thei bawk. Kut dawh chu kan khawngaih avangin tanpuina Rs.10/20 kan pe maithei, chu chu kut pakhat hmanga thilpek a ni. Mahse, an chhungkaw chanchin leh engvanga kutdawh ngai nge a ni tih zawng zawng hriat hnuah chuan khawngaihna piah lamah duhsakna nen Rs. 500/1000 pawh pek kan phal thei, chu chu kut pahnih hmanga thilpek chu a ni. Midang dinhmunah hian hriatna dik kan neih hmasak chuan keimahnia a thawh dan hi a dang daih thei a ni.
A thil tum : Vidyanjali in a tum ber chu sorkar sikul (Govt. & Govt. Aided) ten hma an lo sawn theih nana vantlang (mimal/pawl) ten sikulin an mamawh ang kan thiamna leh kan thil neih kan pek theihna kawng hawn hi a ni. Chutianga vangtlang (mimal/pawl) sikul mamawh ang thiamna emaw bungrua emaw petute chu Volunteer tih an ni. Entir nan – sikul pakhat chuan mathematics zirtirtu an nei lova, an veng/khua a mathematics thiam chuan mahni inpe (volunteer) in kar khatah vawi 2/3 te a lo va zirtir a emaw sikul in printer an nei lova, an veng/khuaa mi inphal (volunteer) in printer a pe. Amaherawhchu, Vidyanjali ah hian thil pakhat phal loh a awm a, chu chu sikul te hi sum faia tanpui phal a ni lo.
A pawimawhna leh tulna : Sorkar sikulte chu a neitu sorkarin an mamawhte chu ngaihtuah sela, mipui kan lo chet vena tur a awm em ni tih kan rilruah zawhna a awm maithei, a dik ngawt mai. Sorkar sikul chu a neitu sorkarin a enkawlin a ngaihsak tur a ni. A nih leh sorkar chu tunge ? Sorkar sikul neitu pawh chu tunge ? ti ta ila, sorkar chu nang leh kei hi kan ni, engvang nge kan tih chuan sorkar siamtu chu mipui kan nih vangin, chuti a nih chuan sorkar sikul neitu chu tunge kan tih chuan nang leh kei tho kan ni tihna a ni. Mi tam tak chuan sorkar neitu kan nihna hi kan hre tawk lova, chuvang chuan sorkar thil leh hmalakna hi mahni ta anga en nachang kan hrelo fo niin a lang. Sorkar sikulte hi a neitu chu nang leh kei kan ni a, a chhiat a thata mawhphurhtu pawh nang leh kei kan nih tih Vidyanjali hian min hriat thar tir mawlh rawh se.
India ramah hian sorkar sikul hi 15/16 lakhs vel a awm a, keini aia ram lian leh mipui tam zawk China-ah chuan sorkar sikul hi 6/7 lakhs vel chauh a awm. State dang chu sawi lo ta ila, Mizorama kan sorkar sikul tam tak hi a tira sorkarin a duh thu renga a din ni lo, vantlangin kan din, a hnua sorkar kuta kan hlan leh hi tam taka awm a ni. Hetiang hi kan state dinhmun a nih avangin tunah hian sorkar hian vangtlang (community) te hi sorkar sikul ten hma an sawn a, zirlai tha leh hmantlak zawk an lo chhuah theih nan kaichh^nah min sawm ta a ni e. He sawmna hi volunteer nihna hmanga chhan theih reng a ni.
Mi inphal (volunteer) ten sikul an tanpui theihna tur hi Vidyanjali chuan kawng a hawng a, sikulin volunteer atanga tanpuina an dawnte chu Vidyanjali Portal ah dah luh zel a ni a, hei hi Performance Grade Index (PGI) teh khawng pakhat (Indicator) ah hman a ni. PGI a that hian Centrally Sponsor Scheme (CSS) atang sum dawn a pung thei a, a that loh hian a kiam thei bawk, hetiang a nih avang hian PGI a sang tur hian Vidyanjali kaltlanga sorkar sikul ten mi inphal (volunteer) atanga an mamawh an hmuh tam hi a pawimawh hle a ni.
Mahnia lo zirchiang duh tan vidyanjali.education.gov.in ah luh theih reng a ni a, volunteer nih duh tan pawh hemi Portal/QR code scan hian in register theih reng a ni. Hriat belh duh nei tan samagra.mizoram.gov.in leh vidyanjali2.0 (Youtube channel) ah te en tur a awm reng bawk e.
Ka ramin enge min tihsak theih tih inzawt lovin, ka ram tan enge ka tihsak theih tih lo inzawt ve rawh le.