Villa an chak nawn leh

Nilai zana champions league last 16, second leg-ah Aston Villa chuan an mikhual Club Brugge chu 3-0 in an sawp a, si belhkhawmah 6-1 ngawta hnehna changin quarter-final an lut.
Villa Park-ah chak mamawh taka lenglut Club Brugge hian bul an tan chhe viau a, inkhel tan atanga minute 16-na lekah Kyriani Sabbe hnawhchhuah nghal a ni. Mikhual team niin, tlem zawk ni hma viau mah se Belgian club hi an tang thei viau thung a, goal chhuah loin an awm reng a. Chawlhlawk hmain goal lut a awm lo.
Chawlhlawk hmain goal thun thei lo mah se chawlhlawk hnu lamah Villa in goal thum ngawt an thun ta thung. Villa tan hian Marco Asensio chuan minute 50-naah hmahruaina goal a thun. Asensio goal thun hnu lawk minute 57-naah Ian Maatsen chuan an goal hnihna a thun zui zat a. Minute 61-na lekah goal hmahruai thuntu Asensio chuan an goal thumna a thun zui leh a. Aston Villa hian minute 11 chhung leka goal thum an thun an chakpui a, si belhkhawmah 6-1 ngawta hnehna changin quarter-final an lut.
Aston Villa hian quarter-final-ah fiahna hautak zawk an hmachhawn zui a ngai dawn a. EPL-a hmahruai mektu Liverpool hnawtchhuaktu Paris St-Germain an hmachhawn zui leh dawn. PSG lakah hian hnehna changin, Liverpool phuba laksak ngei an tum ang.
Nilai zana inkhel dangah Borussia Dortmund chuan 2-1 in Lille an hneh a, si belhkhawmah 3-2 a chakin quarter-final an lut ve bawk. Dortmund hian quarter-final-ah FC Barcelona an hmachhawn zui leh ang.