Villa champ lawmtu langsar ber Prince William

Instanbul khawpuia Europa League final match-ah Ningani zan khan English Aston Villa chuan si thum faiin Freiburg an sawp a, Birmingham khaw club Villa chak lawmnaa langsar ber chu England lal fapa William a ni.
Aston Villa fan ruhkawl Prince of Wales hian kum 30 tehreng trophy hawn zo tawh lo a club tan berin Besiktas Park-a final an khel hi a hmunah tawiawmin, inkhelh chhung zawng khan a tanzia chetzia hmangin a lantir tluan chhuak a, a pian kum 1982 hnu lama Villa kuta European trophy a luh leh vawi khatna lawmin a phar nasa hle.
William-a hi Aston Villa-in European Cup final-a Bayern Munich an hneh tum May ni 26, 1982 herchhuah atanga ni 26 a liam leh rual chiah khan London khaw damdawi inah a piang a, a pian atanga kum 43 hnuah a club tan berin Europe trophy an hlawhchhuak leh ta chiah a ni.
Lal fapa hian social media lamah lawmpuina thu tarchhuak zui nghalin, “Zan mak danglam tak a va ni em! Kum 44 chhunga European silverware hmasaber lawm boruak zet chu le!
Player, team, staff leh he club nena inzawmna nei zawng zawngte lawmpuina ka hlan vek che u,” tiin.
Engllish media leh fans lam chuan Aston Villa an chak rual chiah khan an champion-na khawpui Istanbul pawh ‘Astonbul’ tiin a hming an thlak nghal a; Youri Tielemans, Emiliano Buendia leh Morgan Rogers-te goal hmanga Europa League title an hlawhchhuah lawmin Turkish khawpuiah an lal fapa hoin English fans an sapatal!
Television camera-te chuan final tan hma atangin prince lam an tinzawn sek tawh a, Villa captain John McGinn kuta trophy chawisan a nih rual khan lal fapa hian lal chhungkaw kalphung zawma awmdan mawi, nuih dan mawi, chet dan mawi tithe chu a zawm em em hranin a lang lo a; a hnuah McGinn ngei pawhin hnehna an chan ruala Prince William awm dan chu ‘mi pangngai chet dan’ tiin a sawi chhuak nghe nghe.
McGinn chuan TNT Sports hnenah: “Thawmhnaw pangngai ve mai inbel thin, mi pangngai a ni. Inkhel kan tan hma pawhin dressing room-ah min lo tlawh a; Villa fan ruh tak a ni a, kan inkhel hi a hlah zen zen lo a, a thlawpna kan dawng bik hi kan nihlawh takzet a ni,” a ti.
Berkshire-a sikul a luh lai atangin lal fapa hian Villa a tan tan a; kum 2015 daih tawh khan chu mi chungchang chu BBC-ah sawi chhuak tawhin, “Hun rei tawh takah khan sikul ka kal laiin football lam ngaihtuahna hun ka nei a, club hrang hrang ka thlirkual hnuah sikula ka thiante zawng zawng chuan Manchester United an tih loh leh Chelsea lam an hawi thup a, kei kha chuan club naran leh a laihawl vela then mai mai team ka ngaina lo.
“Table laihawl chunglam luah pha tur team ni se, phurna sang tak min pe thei emaw tlak pawha na taka insawh chawrh thei team law law zui ka duh a ni,” tiin sap naupang dang ang bawka a club tan zawng a thlan dan a sawi.
Lal fapa hian a club zui mek chu san chang leh hniam chang nei a nih thu sawiin, history ropui tak neitu a nih thu leh FA Cup game a thlir hmasakber pawh kum 2000-a Bolton vs Aston Villa a nih thu te, kha mi kum final-a vanduaithlak taka Chelsea an hneh loh boruak a tarlang tel.