Village-Level pawimawh

Dampa bialtu MLA thar Dr R Lalthangliana chuan a bial khaw tinah an mamawh zual bik ena bawhzuitu tur Village-Level Development Plan ang deuh din tum a ni, tiin tun hnai khan a sawi a. “MLA fund atanga tih theih a awm laiin, a then chu aspirational district a nih anga hmalak chi, thenkhat chu kum 2028-a kan sawrkar huna thawh tur chi..” tiin bialtu MLA thar hian a sawi a.
India ram Panchayati Raj system hnuaia thil tha tak pakhat chu ‘Gram Sabha’ hi a ni. Hei hi khawtlang rorelna (village executive body), vote nei chin tawh phawt tel theihna a nih avangin democracy innghahna lungphum pawimawh tak a ni a, ‘direct democracy’ lan chhuahna a ni. State dangah chuan an kalpuina a rei tawh a, Mizoramah hian kan ti chho tan ve mek a, a nihna tur anga kalpui theih a nih phawt chuan, hma sawt zawt zawt phahna tur a tling thei ang.
State tinah hian khawpui (urban) leh thingtlang (rural) lam dinhmun hi a inthlau thei em em a. Hei hi India sawrkar chuan a inbuktawka a kal theihna turin thingtlang khaw lam tihhmasawnna tur policy /programme /scheme tha tak tak a siam reng a. Heng scheme tha tak takte hi a nihna tur anga a kal thin loh avangin thingtlang lam hi an bet tlawk tlawk thin a, khawpui lam erawh a thang uak uak thung. Hei hi langtlang taka village level atanga thiltih a awm thin loh vang a ni ber awm e. Thingtlang khua hmasawnna tur scheme/project buaipui tur chuan a khaw miten thahnem an ngai ber dawn a, chuvangin anmahni’n development hna thawk se, chu chu a that dan ber tur a ni. Hei hi Panchayati Raj system-in a ken tel, a tum ber pawh a ni a, Mizoram pawh hian he kalphung tha tak hi kan zawm that theih hunah hma kan sawn chak phah dawn a ni.
Tun tum Dampa bial by-election laia campaign auhla kha thil pahnih hlawm lian tak takah a then theih a, chu chu ‘ruling bial nih thatna’ leh ‘opposition bial that lohna’ tiin a dah theih mai awm e.
Hei hi tunhma atang tawha inthlan campaign auhla ‘chuai thei lo’ a ni ve hrim hrim a. Hei hian a entir chu eng dang ni lovin, induhsak bikna, hleih neihna (favoritism) a ni deuh mai a. Ruling lama awm chu ‘mawm deuh hmak’ zel tur, opposition lama awm chu ‘ro ngawih ngawih’ zel tur tihna a ni deuh ber awm e.
Sawrkar hi state kil tin hmasawnna tur ngaihtuah tur a ni a, chutih laia ‘opposition bial an ni a, hrek deuh tur’ ti niawm taka thil a kal thin a nih chuan, ram leh hnam thatna tur duh tak tak lo sawrkar an ni tihna a ni dawn a, sawrkarna fawng chelh reng atan mipuiin a hnualsuat mai dawn a ni.