Vitamin-in nun ti tawi

Vitamin-in nun ti tawi
Mithiam ten zirchianna an neih tharah vitamin emaw a supplement emaw ei nasa te chu a ei ve lo te aiin an nun a tawi zawk niin an sawi tlat mai.
University of Eastern Finland a mithiam Dr Tomi-Pekka Tuomainen leh a thawhpui ten zirchianna hi neiin, mi 1,800, kum 62 leh 74 inkar te kum 10 chhung an thlithlai hnuah thutlukna hi an siam ta a ni.
Kum 10 chhung an thlir zui chhung hian mi 221 zinga 59 (26.6%), vitamin emaw a supplement emaw regular taka ei te chu an thi a, chutih laiin mi vitamin emaw a supplement emaw ei ve lo 1553 zinga 281 (18.1%) chiah an thi ve thung a ni.
Zirchianna neitu te hian an thih mai theihna chhan hrang hrang te uluk takin an zir tela- kum upat dan te, mipa nge an nih hmeichhia, an mei zuk dan leh zu indan bakah an chhungkaw damrei dan thlengin an teh a, chumi hnuah vitamin emaw a supplement emaw regular taka ei te chu 50 to 70 per cent in thih hmana risk an nei sang zawk niin an sawi ta a ni.
He zirchianna hian tunhnaia zirchianna dang University of Minnesota a mithiam ten hmeichhe 38,000, an kum chawhrual kum 62 te an zirchiannaa vitamin emaw a supplement emaw ei nasa te chuan thih hma theihna risk an nei sang hret ni a an lo sawi pawh a rawn thlawp ve ta chiah a ni.
Mahse, heng zirchianna pahnih te hian vitamin emaw a supplement emaw an ei vanga thihma ni lovin, inzawmna a nei an ti chauh a ni.
Vitamin emaw a supplement emaw ei nasa te tana thih hmana risk awmna chhan hi an sawi thei bik mai lo nain, Tuomainen chuan, “Vitamin emaw a supplement emawah te hian iron leh copper a tam a, kan taksain a mamawh bak chu hriselna atan a hlauhawm tho a, hei hi a chhan pakhat a ni thei maithei. Heng metal te hi pro-oxidants an ni a, oxidative stress an siam thei a, chu chu natna benvawnin a zui duh hle a ni,” a ti.
He zirchianna chungchang hi journal Archives of Internal Medicine-ah tarlan a ni.