Vladimir Putin an Seoul vau

Vladimir Putin chuan South Korea in ralthuam hmanga Ukraine a pui a nih ngat chuan tihsual lian tak a ni ang tiin a vau zui nghal.
A hma lawkin Seoul chuan Russia leh North Korea in beihna an hmachhawn a awmin inpui tawn tura inremna thuthlung an ziah hnuah Ukraine chu ralthuam hmanga a puih mai theih thu a lo sawi tawh a ni.
Seoul in Kyiv hnena ralthuam a pe a nih chuan South Korea leadership ten an lawmloh nasat turin Moscow chuan thutlukna a siam ang, tiin Putin chuan a sawi.
Heng thu te hi Russian leader hian Vietnam a tlawhna a sawi niin Pyongyang atangin Hanoi khawpui a pan a, a hma in North Korean leader Kim Jong Un nen defence agreement an ziak a ni.
Putin chuan US leh a thawhpui tena Ukraine hnena ralthuam an pe chhunzawm zel a nih chuan Moscow chuan Pyongyang chu ralthuam a pek mai theih thu a sawi bawk a.
“Ralthuam pe tute hian keini nen indo lo angah an in ngai a. Ka sawi duh chu Pyongyang pawh telin khawvel hmun dang dangah ralthuam pe ve turin dikna kan nei a ni” tiin Putin chuan a sawi.
Seoul chuan a hma in Russian-North Korean agreement chu a dem thu sawiin an ram national security tana pawi a ni tiin national security adviser Chang Ho-jin chuan sawiin Seoul chuan Ukraine hnena ralthuam thawnluh a ngaihtuah nawn mai thei a ti zui bawk a ni.
Putin thusawi hnu hian South Korea presidential office chuan Ukraine hnena ralthuam pek tur chungchang chu duhthlan tur tam tak a ngaihtuah tur thu sawiin Russia in he issue a kalpui dan a zir zelin an kal tur thu a puang nghal thung a.
Russian ambassador Georgy Zinoviev pawh ko nghalin, Mosow chuan Pyongyang nena military cooperation an neih chu titawp nghal turin an ngen bawk.
South Korea chuan humanitarian aid leh military equipment Ukraine hnenah tanpui nan a pe sa reng tawh a, mahse, ralthuam hlauhawm erawh a la pe ngai lo thung a, a chhan pawh official policy a neihah indo mek ram te hnena ralthuam pek loh a neih vang a ni.
Ukraine chuan Moscow leh Pyongyang tena military cooperation an neih karah Seoul chuan a ngaihdan a sawhsawn an beisei thung a. Analysts te chuan Putin an Pyongyang a tlawhna chu Kyiv in Seoul nawr nan remchangah a hmang an ti bawk.
North Korea hotu Kim Jong un chuan Putin hnenah Russia in Ukraine a run chu an thlawp bur thu a lo hrilh bawk a. Russia chuan Ukraine ah North Korean missile te a hmang ngei tia sawi a ni bawk.
US national security thupuangtu John Kirby pawhin Russian-North Korean agreement chu Korean peninsula a remna leh muanna tichhe thei tiin a sawi a. Mahse, US chuan inremna siam chu mak a tih loh thu sawiin ram pahnih te chuan thla tam tak defence lama thawhhona an neih theih nana hma an lak sa tawh thu a sawi bawk.
Tokyo pawhin President Putin an North Korea nena military technology-cooperation an kalpui mai theih thu a sawi chu dem hle bawkin Japan sorkar thupuangtu Yoshimasa Hayashi chuan inremna chu ‘pawmtheihloh’ tiin a sawi bawk.
Analysts te chuan Russia-North Korea inremna chuan khawvel hmun dang pawh a nghawng vek thei tiin an sawi a. Langsar takin North Korea chuan Russia hnenah ralthuam a pe tawh a, Korean peninsula buainaah Russia chu langsar takin a inrawlh thei tawh bawk an ti.
Korea ram pahnihte hi technically a la indo reng niin an ramri te chu rip taka la venin a awm mek a, tun hnaia an inlaichinna a chhe zual bawk.
Ningani pawh khan North Korean sipai te chuan ramri an lut a, mahse, South Korean sipai tena warning nana silai an hmehpuah hnuah an let leh nghal thung a, buaina nasa a thleng lo hlauh thung.