Vodka um lian ber

British spirit brand Au Vodka chuan Guinness World Records siam theihna khawpa vodka um lian an siam a, he vodka um hi meter 2.1 a sang niin, vodka litre 250 a leng a, Stansted Airport-ah an phochhuak a, June ni 24 thleng airport-ah hian an chhawp chhuak dawn a ni.
Au Vodka managing director Charlie Morgan chuan, “Zu market-ah thil danglam chhawp chhuah hi kan tum ber pakhat a ni a, advertisement kalphung pangngai lo deuh kan zawng phah bawk a ni,” tiin he vodka um lian an siamna chhan a sawi. Carlie Morgan hi 2013-a Swansea leh Chelsea inkhelh tuma ball boy Eden Hazard-a’n a pet kha a ni.
Morgan chuan, “Stansted-a khawvela vodka um lian ber kan phochhuah hi khawvel huap vodka market-a kan brand chim chin a san lehzual theih nana kan tih a ni,” a ti bawk.
He vodka um lian hi an lilam dawn a, pound 1,50,000 a chhan tan theih a ni ang. Au original vodka, 700 ml um kha hi pound 34.99 man a ni a, vodka um lianah hian a um pangngai aia a let 357 vela tam zawk a awm a, a man erawh a let 4,287-in a to zawk thung.
A hmaa vodka um lian ber record chu Polish brand Chopin siam niin, litre 200 dawng a ni ve thung.
Au Vodka hi a lar sawt riau a, influencer Jake Paul chu an vodka um tattoo a banpuam-ah chhutkai tirin, dollar 2,50,000 an hlawh tir a, hei hian a vawrh lar lehzual ta a ni.