JUNE 4, 2024 :
Lok Sabha 19na siam tura India ram General Election chhawng sarih zet neih result chu vawiin June 4, 2024 zing dar a\angin India ram pumah chhiar \an a ni a. Inthlan hmaa mipui ngaih dan lak khawm (Opinion Poll) leh vote thlak zo hnen a\anga tu party nge an vote tih zawhna chhanna a\anga ngaih dan lak khawm ( Exit Poll) result te chu tun hma lama inthlan awm tawha an lak khawm aiin a dikna (accuracy rate) a tla hniam hle a ni. Hei hian tuma hmuh loha mipui duhthlanna a la nghehzia a ti lang a tih theih.
BJP an inteh \helh
Inthlan puan hma hauh a\ang tawhin BJP chuan “magic 400 seat” lak an tum thu leh chumi tur chuan national leader a\anga booth level party worker te pawh rim takin an thawk a. Kumin 2024 kum tira Ayodhya hmuna Ram Mandir hawnna chu unofficial-a Lok Sabha election campaign hawnna a ngaih theihin ropui takin an hawng a. Hindu sakhaw biakin hawnna ni mahse Opposition party hruaitu tam takin he sakhaw beh chhan hi politics verther tak tela an hmuh avangin telna tlakah an ngai lo.
Tun dinhmuna a lan dan chuan BJP leh NDA hnuaia a thawhpui party te hian seat 543 awmah seat 295 (@ 4:51 pm) la thei dinhmunah an awm a, final result ah tam/tlem hret thei a la ni. Sorkar siam theihna number 272 khumin an sorkar leh dawn tih a chiang tawh e.
Sakhaw beh chhan politics ngaihsanna a hniam em?
Hindu sakhaw beh chhana kum tam tak chhung India ram politics-a an lo thununna chuan mipui thinlungah hmun a chang nep ta tih loh rual lohin Lok Sabha election result chuan a rawn nem nghet a tih theih awm e. BJP kulhpui nghet Uttar Pradesh MP seat 80 lai neiah an beisei zat seat an hmu pha lo mai ni loin Samajwadi Party chu seat lak tamah an tluk ta lo. Result hi official a puan vek la ni lo mahse danglamna lian tak a thleng tawh lo tura ngaih a ni. Ayodhya awmna Parliamentary constituency ngei pawh SP in hnehna an chang a ni. UP ah hian SP hi seat 44 ah hma an hruai a, BJP 37 ah hma an hruai thung. Hetiang tho hian State lian dangah pawh Hindu sakhaw zuitu tlimpui awmnaah pawh sakhaw beh chhan politics hi tun hma angin hna a thawk hniam ta deuh em ni tih MP Election results hian a rawn lantir a tih theih awm e.
Sawi zel teh ang
Central Minister hmeichhe zinga hrohrang na tak Amethi biala kum 2019 inthlana Rahul Gandhi khing thlatu Zubin Smriti Irani pawh vote 50,000 chuangin a khingpui Congress candidate KL Sharma lakah tla chiang tawha ngaih a ni. Hranghlui filmstar lar Hemamalin pawh UP a\ang hian BJP ticket-a tling leh ngei turin hma a hruai bawk.
Hemamalin hmai anga mam
Mizoramah kan politician te \awngkam lar tak chu kawng \ha leh mam sawina atan “rulngan pa ang zar” tih anih lai hian Central India lamah thung chuan, “Hemamalin hmai anga mam” an ti ve thung.
India chhim lam state – Maharashtra, Karnata, Tamil Nadu lamah BJP leh NDA chhunga a thawhpui party an che \ha tawk lo hle a, Tamil Nadu leh Kerala state bik phei hi chu zei dang nei an nih avangin BJP hi an che hlei thei lo a, tun tumah pawh chumi tho chu result hian a rawn lantir leh a ni. Hetih lai hian Telengana ah BJP hian seat 17 awmah 8 lai chang tura ngaih an ni a, hma an sawn thung a. Andra Pradesh seat 25 awmnaah inthlan hmasaa seat hui deuh vektu YSRCP chuan seat 4 chauh an la dawn a, BJP hian Chandrababu Naidu hruai TDP a thawhpui a seat 21 la tura ngaih an ni. State Assembly seat 175 awmnaah TDP hian seat 132 an hui a, YSRCP chuan 16 chauh hmuin 2019 MLA election-ah khan seat 135 an la a, TDP leh BJP \ang dun an ngam lo hle.
Opinion Poll & Exit Poll lamah BJP hi W. Bengal-ah TMC aia seat hmu tam zawk tura hrilhlawk chu a takah chuan hetiang hi a ni dawn ta hauh lo bawk, TMC 30, BJP 11, INC 1 chu seat an insem dan tur a nih tawh hmel.
Odisha seat awmnaah rorel lai Biju Janata Dal (BJD) Naveen Patnaik kaihhruai chu Lok Sabha election ruala state assembly inthlang an ni a, kum 24 lai an ro relna chu BJP hian an chhuhsak dawn tih a chiang tawh bawk a, BJP hian seat 147 awmah seat 77 (+54) an la dawn a, BJD hian 53 an la dawn a, 2019 MLA election aiin seat 60 in an la tlem zawk a, INC in seat 16 (+7) an chang dawn bawk.
Congress leh I.N.D.I. A pawh an inbeisei angin an che \ha chuang lo
June 1, 2024 tlai khan Congress hruaitu lianho chu Delhi ah Lok Sabha election result tur thlir lawkin an inhmu khawm a, AICC president Arjun Kharge chuan MP seat 295 leh a chung lam an hmuh tur thu leh BJP leh NDA chhunga a thawhpui party dangte nen seat 230 bawr vel an lak tur thu a sawi a. Tun dinhmuna a lan dan chuan Congress party leh I.N.D.I.A chhunga party te hian seat 229 (@ 4:51pm) la tur niin an lang a, 2019 election aiin seat 102 in hma an sawn thung a, final result chu la danglam thei reng a ni.
Mizoram result ve thung
Result kimchang tar lan tumna ka nei lem lo. Kimin 2024 inthlan kha Mizoram Lok Sabha MP inthlan campaign awm tawh zinga political party te campaign nasat ber \um a ni hial awm e. Hei mai hi a ni lo, ruling party candidate chuan mimal taka beih a tawk nasa hle a. Social media platform hrang hrangah nasa taka umzui leh diriam a hlawh nasa hle a. Mahse heng political party worker-hote beihna \awngkam feikibar leh chem hriam zawng zawngte chu mipui ngeng a chhun thleng hlek lo tih result hian a rawn nem nghet chiang ta hle ti ila a sual kher lo ang.
Chuvangin political party tin a\anga nileng zankhuaa social media a ram hmasawnna tur hnuk tak tak sawi thleng phak lawi si lote mahni party ni lo sawi chhia leh demna ringawt thu sawi level hian mi thinlungah ram a la lo tih leh heng thu hi mipuiin an kham hle tih hriain hma i sawn san daih tawh ang u.
-- Advertisement --
Source :
INDIA TODAY TV