Vote chhiar hun la sawn lo, MKHC-in ngen zel tum

Mizoram inthlan vote chhiar hun tura tih December ni 3 chu Chawlhni a ni a, Mizoram Kohhran Hruaitute Committee (MKHC) kaihhruaiin tlawmngai pawl leh political party hrang hrangin a hun sawn turin ECI an ngen mek. Vote chhiar hun sawn thawm hriat tur a la awm lo a, MKHC chuan ngen zel an tum.November ni 3, kar hmasa Zirtawpni khan ECI hnenah vote chhiar hun sawn tura ngenna lehkha an thehlut a, darkar 24 an nghah tur thu an sawi. Darkar 24 a liam tawh a, mahse ECI atangin chhanna hmuh a la ni lo.
“Chhanna kan la hmu lo a, thil awmzia kan hre rih lo. An sawn hi kan la beisei reng a, ngen zel pawh kan la tum,” tiin MKHC chairman Rev Dr C Chawnghmingliana, Synod moderator chuan Chawlhni tlaia amah bepawptu The Aizawl Post a hrilh.
Kar hmasa Ningani zan khan MKHC kaihhruaiin NGO Coordination Committee-a tel tlawmngai pawlte leh political party-te an thukhawm a, chuta an rel ang chuan a tukah ECI hnenah hian ngenna an thehlut ta a ni.
Rev Dr C Chawnghmingliana chuan Ningani zana an thutkhawm khan an beisei angin darkar 24 chhunga chhanna an hmu lo a nih pawhin ngen zui zel ni se tia an sawi thu a sawi a, chhanna an hmu lo a nih chuan vote thlak hnuah pawh ngen zel ni se an ti tih a sawi.
“Vote thlak hmain chhanna kan hmu lo a nih pawhin ngen zui zel kan tum a, vote thlak zawhah hun a la awm a, ngawrh zawka ngen kan tum ang,” a ti a, ECI hian an dilna a tihhlawhtlin ngei an beisei tih a sawi bawk.
MKHC hian October ni 11-ah khan vote chhiar ni sawn tura ngenna an lo thehlut tawh a, chumi hnuah Mizoram Synod, MPF leh political party hrang hrangin ECI hnenah hian ziakin an ngen tawh bawk. ECI atanga chhanna engmah a awm loh avangin kar hmasa Ningani zan khan an thukhawm a, ngenna an thehlut leh ta a ni.
MKHC hruaitute chuan inthlan boycott lam an hawi loh thu an sawi a, postal ballot hmanga vote thlak te an awm tawh avangin inthlan boycott hi chu thil tih chi-ah an ngai lo tih an sawi.