Vote chhiar hun sawn ngiatna lantir

Thawhlehni khan Lalbiakthanga (65) Maubawk/Lawipu chuan Vanapa Hall kawtah Election Commission of India-in Mizoram Lagislative Assembly inthlanna neiha vote chhiar ni atana December 3 (Pathianni) a ruat chu a duh loh zia a lantir.
Lalbiakthanga hian Election Commission of India hnenah vote chhiar ni sawn turin ziakin a lo ngen tawh a. ECI lam hian chhanna a pek loh avangin vote pawh thlak duh loin lungawilohna hi a lantir a ni.
Pathiannia vote chhiar chungchangah hian Mizoram Kohhran Hruaitute Commiittee (MKHC), Mizoram People Forum, NGO Coordination Committee leh political party hrang hrang pawhin Inrinni leh Pathianni ni loa vote chhiar hun hi sawn turin ECI hi an lo ngen tawh a. MKHC phei hi chuan NGO Coordination Committee nen thukhawmin vote chhiar ni sawn tura an ngennaa ECI a ngawi reng chu lungawi loin kawng dangin an lo kar tawh a, heti chung pawh hian ECI atangin tun thlengin chhanna an la hmu lo nia hriat a ni.
ECI laka lungawi loh lantir Lalbiakthanga hi Bairabi Zophaia ramri buainaah khan tel ve in hliam tuar zingah a tel a. India Independence Day vawi 75-na pualin hnam inlumngrualna thupuia hmangin Mizoram a fangchhuak a. Burma-a Zohnahthlakte tawrhna tawrhpuiin Aizawl atangin Zokhawthar thleng ke in a kal a. Hei bakah hian Manipur-a Zofate tawrhna tawrhpui nan kumin May khan Imphal thleng kea kal tumin Aizawl atangin a chhuak a, remchan zawkna avangin Churachanpur district thleng ke in a lo kal a ni.