Vote chhiar hun sawn tum thawm la awm lo

Mizorama MLA inthlanpuia vote tla chhiar huna Pathianni ruat a nih avanga sawn tura ngenna chu tun thlengin Election Commission chuan thu thar a la nei lo.
November 7-a vote thlak tur Mizoram inthlan hun atan ni 10 chuang awrh chauh a awm tawh a, vote tla chhiar hun atan erawh thla khat chuang a la awm. ECI-in December 3 – Pathiannia vote chhiar hun atan a ruat avangin Mizoram Kohhran Hruaitute Committee, Mizoram People Forum, NGO Coordination Committee leh political party tin aiawhte chuan Commission hnenah hian Kristiante ni pawimawh leh serh a nih angin, a hun sawn a, Inrinni leh Pathianni ni lo, hun dang ruat turin ziakin an lo ngen tawh a ni.
An ngen atanga ni 20 vel a liam hnu ah pawh ECI hian thu leh hla a la nei lo. Thudawn danin, an la ngaihtuah lo hrim hrim nia hriat a ni.
Chief electoral officer Mizoram chuan amah kawmtu Central YMA hruaitute hnenah vote chhiar hun sawn hi beiseiawm a ni tih a sawi a. Hetihlai hian thudawn danin, vote thlak hun (polling day) sawn a harsat loh viau laiin, state dang ho nena inthlan hun rual a nih chuan, vote chhiar hun sawn bik neih erawh ECI hian a harsat hle thin tih sawi a ni.