Vote chhiar ni…

Mizoram Kohhran Hruaitute Committee (MKHC) chuan Mizoram inthlan vote chhiar hun sawn tura Election Commission of India hnena ngenna an lo siam tawh chu, tun thlenga a chhanna hmuh a la nih loh avangin, nimin khan lehkha an thehlut leh a, ECI hi darkar 24 an nghah tur thu an hrilh a.
Hemi chungchang hi nimin khan MKHC huaihawtin NGO Coordination Committee leh political party hrang hrang aiawhten an ngaihtuah a ni a; mipui ai an awh a, thutlukna hi Mizoram mipuiin an siam, tihna a ni.
Kristianten Pathianni kan hman dan hi ECI lam hian an hrechiang em em ang tih a rinawm a, chuti chunga hetianga harsatna siam zawnga hun an ruahman tlat mai hi, a tuartu lam tan chuan ‘tih luih’ a ni tia ngaih loh theih loh a ni a, hriatthiam a har hle a ni.
Central sawrkarin kum 2017-a Krismas ni ber kher ‘Good Governance Day’ a puan hnan tawh atang khan, Kristiante ni pawimawh palzutna a nih avanga Mizoram mipui thinrimzia leh lungawilohzia an lo hre daih tawh a. Sakhaw dang ni pawimawh, sawrkar ni pawimawh atana puan hnan hi a awm awm pawh hriat a la ni ngai lo. Tun thil hi tihluih, a sawhkhawk eng pawh thleng se pawitihlohna keng tel a ni, a tih theih rum rum awm e. Chu chuan inngeih tlang taka khawsak dial dial theihna India ram, ‘Unity in Diversity’ tia sawi hlawh thin chu pal darh vek pawitihlohna a keng tel a ni, a tih theih bawk awm e.
A lehlamah, India sawrkar hian national integration ngaipawimawhin programme hrang hrang a kalpui a, state hrang hrangin cultural exchange te neiin, hnam hrang hrangte kan inkawmngeih a, kan inpumkhat deuh deuh nan tiin, cheng vaibelchhe tel senna programme a kalpui mup mup reng a. Chutih lai kara a state pum mipuite rilru ti na thei tura ruahmanna a siam leh lawi si leh, chutiang chu a hriat tawh hnu pawha state mipui rilru natna thawi dam tum lova a kaltlangpui lui zel a nih chuan, sawrkar laipui lama thuneitute hian ‘unity in diversity’ chhiatna tur an pawisa lo tihna a ni hial awm e. Darkar 24 nghah ngaia thil a thleng ta hi ECI lam hian ngaipawimawh mawlh teh se.