Duhsak zawngte hnena mipui sum tam tak khawhraltu MNF sawrkar chu mipuiin vote hmanga dah bo tumin an inbuatsaih mek tih ZPM working president K Sapdanga chuan a sawi.
-- Advertisement --
Zirtawpnia an party office-a political session neihah ZPM working president chuan thil danga sawrkarin sum harsat thu a sawi lai mekin an duhsak zawng Kamrula erawh an vur mawlh mawlh reng a, a hna a that loh thu report a awm reng chung leh a hna viltu PWD-in a hnathawh mek an tihtawp sak hial chung pawhin a chungah action lak tumna a awm loa, he contractor hi airport sa chimtu tho kha a ni, tiin, “He sawrkar hian a mipuite zingah riltama thi an awm palh ang tih hlau hleithei lo khawpa rethei anga a awm laiin, a contractor chuamte tan erawh bill a tang ve ngai lo a, tihtawp sak ngai hial khawpa hna a chhe chung pawhin a la vulh ngat ngat a ni,” a ti.
Cheng khat hlawh tura OSD to CM tia an chhawr lah a nuamsa thei ang bera thuamin, tul loah mipui sum tam tak an khawhral bawk tih K Sapdanga hian sawiin, “Heng zawng zawng hi lungawi lo chungin mipuiin kan en liam mek a, vote hmanga dah bo turin kan inbuatsaih mek a ni. Zoram mipui pawhin heng thil thleng hi an hmuh hmaih loa, vote hmanga chinfel an tum mek a ni,” a ti.
Mizoram sawrkar chuan ration buhfaia a belh ve thin tihtawp a tum chu mipui lam phunna leh sawiselna a tam avangin a thu thlak danglamin ruahmanna a siam leh mek tih pawh sawiin, “Kan sawrkar hrawn mek hian sawrkar laipuiin a thlawna buhfai min pek lo doletna takngial pawh a ti hleithei tawh lo a ni ber,” ZPM hruaitu hian a ti.