VOTE THLAK: Mipui rorel Ni

Vawiin hi, Mizoram sawrkar thar din tura Mizoram mipui kalkhawm ten vote hmanga ro an rel ni, vote thlak ni a ni a, Mizoram mipui tana ni pawimawh tak a ni.
Vote thlak hi Mizoram mipuite hian kan ngaipawimawh chho ta hle a, chu chuan ram inrelbawlna (politics) kan ngaihvenin ram leh hnam kan vei tih a kawk awm e.
Kum 2019 Lok Sabha inthlanpuiah khan vote tla kha 67.11% a ni a, chu chu India rama inthlanpui awm tawh zawng zawnga vote tlak that ber tum nia sawi a ni.
Mizoram inthlanpuia voter turnout that ber tum chu 2013 inthlan kha a ni a, vote 83.41% a tla a. 2008 khan 82.34% vote a tla a, inthlan hnuhnung ber 2018-ah a tlahniam a, 81.54% a ni a, mahse hei hi Mizoram inthlanpui awm tawh zawng zawnga voter turnout that ber pathumna a ni pha ve thung.
Mizoram UT a nih hnua inthlanpui vawi 12 neih tawhah vote tlak chhiat ber tum chu 1978 kha niin voter turnout chu 63.27% a ni a. Khatih laia rorellai PC party chhungah neuh neuh a awm avanga a kum leh 1979-a inthlan that a nih leh pawh khan 68.34% chauh vote a tla. Hei bak hi chu inthlan apiangin voter turnout hian 72% a pel vek. Mizorama Inthlanpui awm tawh zawng zawnga voter turnout hi chawhrualin 78.96% a ni a, India ram pum huapa voter turnout that ber tum a khumna a la sang hle a ni.
Tun tum inthlanpui neih turah hian tum dang aiin election commission lam an tang zual a, vote thlak ngaipawimawh tura mipui ngenna leh zirtirna uar taka kalpui a nih avang leh, mipui lamah pawh vote thlak ngaihpawimawhna a san chhoh zel avang hian, Mizoram inthlanpui neih tawh zawng zawnga vote tlak that ber tum a nih theih beiseina pawh a sang hle niin a lang.
Vawiinah hian kum nga chhunga kan ram hruaitu turte hi mipuite kutah an awm mek a, vote hmangin kan thlang chhuak dawn a ni a. Khua leh tui kan nih anga kan tihtur leh mawhphurhna kan kova innghat hi hlenchhuak theuh turin vote thlakna hmunah vote hmanga rorel turin i chhuak khawm theuh ang u.