Vote thlak thei chin …

Tunhma chuan vote thlak thei chin kha kum 21 tling tawh chin a ni thin a. Chu chu rilru leh taksa puitling tawh, mahni chhia leh tha hriatna hmanga thutlukna siam thei tawh china ngaih a ni.
Khawvel thiamna a lo sang zel a, mihring rilru leh ngaihtuahnate pawhin hma a sawn chak ve zel a, tunhmaa puitling china ngaih kum 21 pawh kha, India dan pui “The Constitution (Sixty-first Amendment) Act, 1989” chuan kum 18-ah a lo sawn leh ta a. Kum 18 chin chuan chhia leh tha hriatna thiang tak hmangin thutlukna fing leh awmze nei a siam thei tawh, tih chu mithiamte ngaihdan a ni.
Inthlanpui kan hmachhawn mekah hian Election Commission lam chuan vote nei thei chinte chu vote thlak theuh tura zirtirna ‘Systematic Voters’ Education & Electoral Participation (SVEEP)’ hnuaiah ngawrh takin awareness campaign a kalpui mek a. Hmun hrang hrangah kalin ni tin eichawp zawngte pawh an hnathawhna hmunahte kalchilhin vote thlak pawimawhnate an zirtir a, mahni duhna bera vote thlak chu kan chanvo leh mawhphurhna a nihzia te an hrilh thin a, hei hian awmzia thui tak a nei ngeiin a rinawm.
Tunhma, party politics ruihchilh nasat hun lai, ‘politics tui nu’ tia sawi thin hun lai khan, ram inrelbawlna dinhmun thlir hauh lova, tute emawin ‘chu chu vote rawh,’ ‘chu chu a tha,’ an tih vanga mi sawi leh kawihherna lama thle kual mai mai kha an awm thin a, chung mite chuan vote chu an thlak ve ngei mai a, tichuan an mawhphurhna pawh an hlenchhuak a ni. Mahse, mahni chhia leh tha hriatna thiang tak an hman loh avangin midang salah an intulut tihna a ni. Chu aia la pawi leh tha lo zawk chu — pawisa leh eng emaw therhlo avanga midang sal behna hnuaia vote thlak avanga mi tha lo vote tlin, kha.
Vote thlak hrim hrim hi a tha e, mahse vote-in a ken tel, mi puitling tawh china sawrkarin a ngaih chinte tan chuan, midang duhzawng ni lo, mahni duhzawng ngei thlang ve nalh tura sawrkarin min beisei ang ngeia midang bawh buaina tel lova zalen taka vote thlak hi khua leh tui tha tihtur leh mawhphurhna hlenchhuahna dik tak chu a ni.