Vote thlak upa bera chhal hnenah ngaihhlutna thilpek

Mizoram MLA inthlana vote thlaktu zinga upa ber nia chhal Famiangi (115), Pangkhua Lawngtlai district hnenah Lawngtlai district election officer, bawrhsap Joseph H Lalramsanga chuan an bialtu BLO kaltlangin ngaihhlutna thuziak (appreciation letter) leh sumfai Rs. 2000 a hlan.
Lawngtlai East assembly biala awm Pangkhua ami Famiangi w/o Hainawn Thlaceu (L) hi kum 115 nia inchhal a ni a, inthlan ni khan polling booth-ah vote a la thlak a ni.
A EPIC-ah hian kum 1920 a piang anga ziah ni mah se, amah hi upa tawh tak a nih vangin EPIC siam lai vel hian a pian kum dik tak hriat a niloa, rinthu in a pian kum hi dah a ni tih Pangkhua khawtlang hruaitute chuan an sawi a. An theih ang anga kum upa lamte leh a fate biaa an chhut danin, kum 1910 hnulama piang chu ni theiin an ngai lo tih an sawi.
An khawtlang hruaitute chuan Pi Famiangi hian inthlan hi a ngaipawimawhin vote thlak ngei a duh thin a, tun tum MLA inthlanpuiah pawh phur takin vote a thlak tih an sawi a ni.